دادو ڊسٽرڪٽ رپورٽر: مختيار علي جتوئي
دادو: دادو رابطا ڪاميٽي سول سوسائٽي جي مرڪزي چيئرمين غلام مصطفىٰ جانوري جي هدايتن تي 31 آڪٽوبر ۽ پهرين نومبر، ڇنڇر ۽ آچر جي ڏينهن، تنظيم کي وڌيڪ مضبوط ۽ فعال بڻائڻ لاءِ ميمبرسازي ڪئمپ لڳائي ويندي، جنهن ۾ عام شهرين کي تنظيم جي ميمبرشپ حاصل ڪرڻ جي دعوت ڏني ويندي.
ان موقعي تي دادو رابطا ڪاميٽي سول سوسائٽي جي مرڪزي چيئرمين غلام مصطفىٰ جانوري پنهنجي بيان ۾ چيو ته تنظيم جي ميمبرسازي ڪئمپ لڳائڻ لاءِ اڳ به اعلان ڪيو ويو هو، پر ڪجهه سببن جي ڪري ان کي ملتوي ڪرڻو پيو. هن چيو ته هاڻي اعلانيل تاريخن مطابق ميمبرسازي ڪئمپ کي ڪامياب بڻائڻ لاءِ سمورا انتظام ڪيا ويندا.
غلام مصطفىٰ جانوري دادو جي شهرين کي اپيل ڪئي ته هو دادو رابطا ڪاميٽي سول سوسائٽي جو ساٿ ڏئي تنظيم کي وڌيڪ سگهارو بڻائين، جيئن تعلقو دادو ۽ شهر اندر عوام کي درپيش بنيادي مسئلن جي حل لاءِ گڏيل ڪوششون ڪري سگهجن.
هن وڌيڪ چيو ته تنظيم جو مقصد عوامي مسئلن جي نشاندهي ڪرڻ، شهرين جي آواز کي لاڳاپيل اختيارين تائين پهچائڻ ۽ عوامي ڀلائي لاءِ گڏجي ڪم ڪرڻ آهي. ان ڪري شهرين کي گهرجي ته ميمبرسازي ڪئمپ ۾ ڀرپور شرڪت ڪري تنظيم جو حصو بڻجن.
