احتجاجي بک هڙتالي ڪئمپ جي اڳواڻي ضلعي صدر قومي عوامي تحريڪ حيدرآباد نذير بليدي ڪئي، جڏهن ته نائب صدر بابو ميمڻ، معشوق چانڊيو، مرڪزي نگران ايڊووڪيٽ زاهد ڀنڀرو، خادم سمون،رفيق ڪنراڻي، امداد پنھور، شوڪت سريوال، راول سيال بابو سولنگي، گلزار ڪلھوڙو، ثنا الله، آزاد ميرواھي، نظير لاکو، شمن چانڊيو، راجا چانڊيو چيتن ڪمار، ۽ ٻيا اڳواڻ پڻ موجود هئا. ان موقعي تي سنڌياڻي تحريڪ جي مرڪزي صدر زينت سمون، مرڪزي جنرل سيڪريٽري نصرت خاصخيلي، ماروي خاصخيلي، صبا سمون، بختاور چنڊ راحيلا ڀٽو ۽ ٻين عورت اڳواڻن پڻ ڀرپور شرڪت ڪئي.
احتجاج کي خطاب ڪندي اڳواڻن چيو ته ڪراچي ۾ سرگرم دهشتگرد ۽ سنڌ دشمن ٽولا روزانو سنڌ کي ٽوڙڻ ۽ نون انتظامي يونٽن جي قيام لاءِ حڪومت کي بليڪ ميل ڪري رهيا آهن. هنن چيو ته عالمي سامراجي طاقتون سنڌ جي وحدت خلاف منظم سازشون ڪري رهيون آهن، پر قومي عوامي تحريڪ ۽ سنڌ جو غيرتمند عوام ڪنهن به صورت ۾ سنڌ کي ٽوڙڻ جي اجازت نه ڏيندو. اڳواڻن خبردار ڪيو ته جيڪڏهن سنڌ جي وحدت خلاف ڪو به اعلان ڪيو ويو ته سڄي سنڌ کي بلاڪ ڪري سخت احتجاج ڪيو ويندو.
اڳواڻن چيو ته سنڌ هزارين سالن کان سنڌين جي ڌرتي رهي آهي ۽ ان تي ڪنهن به قسم جي والار يا قبضي کي برداشت نه ڪيو ويندو. هنن سخت لفظن ۾ اڳواڻن سخت ردعمل ڏيندي چيو ته پيپلز پارٽي سنڌ جا وسيلا وڪڻي اقتدار جي سوديبازي ڪري رهي آهي ته جيئن بلاول ڀٽو زرداري کي وزيراعظم بڻايو وڃي. تيل، گئس، بندرگاهون، درياهه، ڪوئلو ۽ ٻيا قدرتي وسيلا لٽي سنڌ کي معاشي طور مفلوج ڪيو پيو وڃي.
هنن وڌيڪ چيو ته غيرقانوني ڪئنال ۽ ڪارپوريٽ فارمنگ جا منصوبا سنڌ کي بنجر بڻائڻ جي منظم سازش جو حصو آهن، جن کي ڪنهن به صورت ۾ قبول نه ڪيو ويندو. اڳواڻن جو چوڻ هو ته 26هين ۽ 27هين آئيني ترميمون آزاد عدليا، جمهوريت ۽ بنيادي انساني حقن تي سڌو حملو آهن، ۽ حڪمران ڪارا قانون لاڳو ڪري عوام جي آواز کي دٻائڻ چاهين ٿا.
اڳواڻن اعلان ڪيو ته قومي عوامي تحريڪ، اياز لطيف پليجو جي اڳواڻي ۾، حقيقي جمهوريت، آئين جي بالادستي، انساني حقن جي تحفظ ۽ سنڌ دشمن منصوبن خلاف جدوجهد جاري رکندي ۽ سنڌ جي انچ انچ جي حفاظت ڪندي. هنن حڪمرانن کان مطالبو ڪيو ته سنڌ دشمن منصوبا، عدليا تي حملا ۽ ڪارا قانون فوري طور تي واپس ورتا وڃن.
اڳواڻن اعلان ڪيو ته ڊسمبر مهيني دوران قومي عوامي تحريڪ حيدرآباد ضلعي جي هر ڳوٺ ۽ جھرجھنگ ۾ وڃي يونٽ سطح تي عوام کي سجاڳ ڪندي ۽ سنڌ دشمن منصوبن خلاف پرامن، جمهوري جدوجهد جاري رکندي.
