روهڙي 18 سالن کان بس پوائنٽ کان محروم گورنمينٽ عطا حسين شاهه ڊگري ڪاليج روهڙي جي نياڻين جا سخت مسئلا گورنمينٽ عطا حسين شاهه ڊگري ڪاليج روهڙي ۾ پڙهندڙ نياڻيون گذريل 18 سالن کان بس پوائنٽ جي سهولت کان محروم آهن

جنهن سبب روزانو ڪيترن ئي ڪلوميٽرن جو پنڌ، وڌندڙ سفري خرچ ۽ لاڳاپيل ادارن جي مسلسل بي توجهي نياڻين لاءِ مستقل عذاب بڻجي وئي آهي تفصيل موجب روهڙي قومي شاهراهه جي ڪناري واقع گورنمينٽ عطا حسين شاهه ڊگري ڪاليج روهڙي جون نياڻيون مختلف ديهاتي ۽ شهري علائقن مان روزانو ڪاليج اچ وڃ ڪن ٿيون پر بس پوائنٽ جي سهولت نه هجڻ ڪري کين هر روز ڪيترن ئي ڪلوميٽرن جو مفاصلو طئي ڪرڻو پوي ٿو بس پوائنٽ نه هجڻ سبب اڪثر نياڻيون پنڌ ڪري ڪاليج پهچڻ تي مجبور آهن جيڪو نه رڳو جسمي مشقت پر شديد ذهني دٻاءُ جو به سبب بڻجي رهيو آهي ڄاڻايو ويو آهي ته ڪاليج جي بس محترمه بينظير ڀٽو شهيد جي سانحي واري ڏينهن لڳ ڀڳ 18 سال اڳ شرپسند عنصرن نذرِ آتش ڪري ڇڏي هئي پر حيرت انگيز ڳالهه اها آهي ته ايترو ڊگهو عرصو گذرڻ باوجود نه ڪا نئين بس فراهم ڪئي وئي ۽ نه ئي ڪو متبادل انتظام ڪيو ويو ڪاليج جي مک دروازي ڀرسان اڄ به ساڙيل بس جو ڍانچو موجود آهي جيڪو نياڻين لاءِ محرومي،لاپرواهي ۽ سرڪاري غفلت جي علامت بڻيل آهي بس سهولت نه هجڻ سبب روهڙي سٽي،علي واهن،ڪنڌرا،روشن آباد، ٽنڊو ٺٽي،ٽنڊو بوراهو،اروڙ سميت ٻين علائقن مان ايندڙ نياڻين کي يا ته روزانو پنڌ ڪرڻو پوي ٿو يا وري خانگي گاڏين ۾ ڀاڙو ادا ڪري ڪاليج پهچڻو پوي ٿو دير سان پهچڻ سبب نياڻين جي حاضري متاثر ٿئي ٿي، جڏهن ته غير محفوظ سفر سبب والدين سخت پريشاني ۾ مبتلا آهن نياڻين جو چوڻ آهي ته ڊگهي پنڌ سبب ٿڪاوٽ پڙهائي تي ڌيان گهٽجڻ ۽ ڪڏهن ڪڏهن تعليم ڇڏي ڏيڻ جا خدشا پڻ پيدا ٿين ٿا تعليمي ماهرن ۽ شهري حلقن موجب نياڻين لاءِ سفري سهولت فراهم ڪرڻ بنيادي طور تي تعليم کاتي سنڌ،ڪاليج ايجوڪيشن ڊپارٽمينٽ ۽ ضلعي انتظاميا جي گڏيل ذميواري آهي خاص طور تي ڪاليج ايجوڪيشن ڊپارٽمينٽ سنڌ،ڊائريڪٽر جنرل ڪاليجز سنڌ ۽ ضلعي انتظاميا سکر تي لازم آهي ته هو نياڻين لاءِ محفوظ، باقاعده ۽ مستقل سفري سهولت يقيني بڻائن، جيئن عورتن جي تعليم کي هٿي ملي سگهي نياڻين،والدين ۽ شهري حلقن مطالبو ڪيو آهي ته گورنمينٽ عطا حسين شاهه ڊگري ڪاليج روهڙي لاءِ ترت نئين بس يا مستقل بس پوائنٽ فراهم ڪيو وڃي،نياڻين لاءِ محفوظ،باقاعده ۽ گهٽ ۾ گهٽ ٻن روٽن تي ٻڌل ٽرانسپورٽ سروس شروع ڪئي وڃي،ساڙيل بس جي ڍانچي کي فوري طور هٽائي نئين بس مهيا ڪئي وڃي ته جيئن نياڻين کي نفسياتي دٻاءُ کان ڇوٽڪارو ملي ان سان گڏ 18 سالن کان جاري غفلت بابت جاچ ڪرائي وڃي ۽ گرلز تعليم جي تحفظ ۽ واڌاري لاءِ خاص فنڊ جاري ڪيا وڃن شهري حلقن جو چوڻ آهي ته جيڪڏهن فوري قدم نه کنيا ويا ته ان جا سڌا ۽ منفي اثر نياڻين جي تعليم،حاضري جي شرح ۽ مستقبل تي پوندا،جيڪو ڪنهن به وقت هڪ سنگين تعليمي ايمرجنسي جي صورت اختيار ڪري سگهي ٿو