بنياله شاهه حسن خيل ۾ ٻن ڌرين جي وچ ۾ پراڻي تڪرار تان فائرنگ جي نتيجي ۾ 6 ڄڻا مارجي ويا جڏهن ته 2 زخمي ٿي پيا.
پوليس موجب مارجي ويلن ۾ عطاءُالله گروپ جا 5 ۽ مخالف گروپ جو هڪ شخص شامل آهي، پوليس جي ڳري نفري علائقي ۾ پهچي وئي آهي. سموري علائقي کي گهيري ۾ ورتو ويو آهي پوليس اختيارين جو چوڻ آهي ته ٻنهي ڌرين جي وچ ۾ وقفي وقفي سان فائرنگ جو سلسلو جاري رهيو جنهن جي ڪري علائقي ۾ خوف حراس پکڙجي ويو.
ٻئي طرف ڪڙي خيسو جي علائقي وانڊه علي ۾ گهر تي هينڊ گرنيڊ حملي ۽ فائرنگ سبب 2 ٻار ۽ هڪ عورت زخمي ٿي پئي. پوليس موجب هينڊ گرنيڊ حملو اقبال نالي شخص جي گهر تي ڪيو ويو. واقعي جي خلاف وارثن ۽ پاڙي وارن ايس پي پهاڙپور جي آفيس ٻاهران احتجاج ڪيو. زخمين کي اسپتال منتقل ڪيو ويو جڏهن ته حملو ڪندڙن جي گرفتاري جو مطالبو ڪيو ويو.
پوليس موجب وانڊه علي ۾ هينڊ گرنيڊ حملي ۽ فائرنگ واري واقعي تي جاچ شروع ڪري ڇڏي آهي. مظاهرين جوابدارن جي فوري گرفتاري ۽ تحفظ ڏيڻ جو مطالبو ڪيو آهي.
