غزه ۾ دوائن جي شديد کوٽ پيدا ٿي وئي آهي جنهن جي ڪري اسپتالن ۾ علاج هيٺ هزارين مريضن جون زندگيون خطري ۾ پئجي ويون آهن.
غزه جي صحت کاتي موجب، دوائن جي کوٽ سبب مريضن جي علاج ۾ وڏي مشڪلات پيش اچي رهي آهي، جڏهن ته ليبارٽري ٽيسٽ ۽ بلڊ بينڪ جي سامان جي کوٽ 59 سيڪڙو تائين پهچي وئي آهي.
غزه جي اسپتالن ۾ ڪم ڪندڙ ڊاڪٽرن جو چوڻ آهي ته مريضن جي جان بچائڻ ۾ سخت مشڪلاتون پيش اچي رهيون آهن، ڇاڪاڻ ته مريضن جي تندرستي ۽ صحتيابي لاءِ جيڪي دوائون تمام ضروري هيون، اهي مڪمل طور تي ختم ٿي چڪيون آهن.
غزه ۾ جنگ بندی جي باوجود انساني مدد جي رسائي ضرورت مطابق نه ٿي رهي آهي. صحت کاتي غزه ۾ امداد سان گڏوگڏ دوائن، ليبارٽري ٽيسٽ ۽ بلڊ بينڪ جي سامان جي فوري فراهمي جو مطالبو ڪيو آهي.
عربي ميڊيا جي رپورٽ موجب، اسرائيلي فوج جنگ دوران غزه جي 34 اسپتالن سميت 125 صحت مرڪزن کي مڪمل طور تي تباهه ڪري ڇڏيو آهي.
جنگ بندی معاهدي تحت گذريل ڏينهن اسرائيلي قيد مان 6 فلسطيني قيدين کي دير البلح اسپتال پهچايو ويو، جڏهن ته 10 هزار کان وڌيڪ فلسطيني اڃا تائين اسرائيلي جيلن ۾ قيد آهن.
