واشنگٽن: آمريڪي صدر ڊونلڊ ٽرمپ غير قانوني غير ملڪي ماڻهن کي آمريڪا ڇڏڻ تي رقم ڏيڻ جي پيشڪش ڪئي آهي.
غير ملڪي ميڊيا رپورٽن مطابق يو ايس ڊپارٽمينٽ آف هوم لينڊ سيڪيورٽي غير قانوني غير ملڪي ماڻهن کي سال جي آخر تائين رضاڪارانه ملڪ بدر ٿيڻ تي رقم ڏيڻ جي آڇ ڪئي آهي.
ڊپارٽمينٽ آف هوم لينڊ سيڪيورٽي پاران جاري ڪيل بيان ۾ چيو ويو آهي ته غير ملڪي ماڻهو جيڪڏهن CBP Home ايپ ذريعي رضاڪارانه طور تي پاڻ کي ڊي پورٽ ڪرڻ لاءِ سائين اپ ڪن ٿا، ته انهن کي پنهنجي ملڪ واپس وڃڻ لاءِ مفت هوائي ٽڪيٽ ۽ 3 هزار ڊالر ڏنا ويندا.
هوم لينڊ سيڪيورٽي ڊپارٽمينٽ پهرين هڪ هزار ڊالر رقم کي وڌائي 3 هزار ڊالر ڪئي آهي، جيڪا رضاڪارانه طور تي واپس ويندڙ غير قانوني ماڻهن کي ڏني ويندي.
سيڪريٽري هوم لينڊ سيڪيورٽي، کرسٽي نوم، خبردار ڪيو آهي ته جيڪي ماڻهو پاڻ کي ڊي پورٽ نه ڪندا، انهن کي گرفتاري، ملڪ بدر ڪرڻ ۽ ٻيهر داخلا تي مستقل پابندي جو سامنا ڪرڻو پوندو.
هن چيو آهي ته هن سال جنوري کان وٺي هاڻي تائين 1.9 ملين غير قانوني غير ملڪي رضاڪارانه طور تي پاڻ کي ملڪ بدر ڪيو آهي ۽ هزارين ماڻهن CBP Home پروگرام جو استعمال ڪيو آهي.
