پاڪستان جي ليجنڊري گلوڪار راحت فتح علي خان جي ڌيءَ ماهين خان پنهنجي شادي جي تقريب ۾ پاتل لباس تي تنقيد ڪندڙن کي سخت جواب ڏئي ڇڏيو آهي.
ماهِين خان جي تازو مایوں ۽ نڪاح جي تقريب ٿي، جنهن ۾ هن ڀارتي ڊيزائنر جو لباس چونڊيو هو. نڪاح ۽ مایوں جون تصويرون سوشل ميڊيا تي به وائرل ٿيون، جنهن کان پوءِ ڪيترن صارفين طرفان ڀارتي ڊيزائنر جو لباس پائڻ تي ماهين خان تي تنقيد ڪئي وئي.
تنقيد تي خاموش رهڻ بدران، ماهين خان سخت ردِعمل ڏيندي چيو ته خدا جو واسطو آهي، ماڻهن جي زندگين ۾ مداخلت ڪرڻ بند ڪريو.
هن وڌيڪ چيو ته مان ڀارتي ڊيزائنر جو لباس پايان يا چيني، يا افغانستاني لباس پايان، جيڪو به پايان، اها منهنجي شادي آهي، توهان ماڻهن کي آخر ڪهڙو مسئلو آهي؟
ماهِين خان جي هن وڊيو کان پوءِ سوشل ميڊيا تي مختلف تبصرن جو سلسلو جاري آهي. ڪجهه ماڻهن هن جي حمايت ڪئي آهي، جڏهن ته ڪجهه صارفين سندس ڳالهه سان اختلاف ڪندي چيو آهي ته اهڙو لباس اسان جي ثقافت جو حصو ناهي.
