اسلام آباد: پاڪستان کي موجوده مالي سال ۾ ملندڙ ٻاهرين قرضن ۽ گرانٽ جون تفصيلون جاري ڪيون ويون آهن.
اقتصادي معاملن واري ڊويزن موجب، پاڪستان جولاءِ کان نومبر تائين 3 ارب ڊالر کان وڌيڪ ٻاهرين قرض حاصل ڪيو، جيڪو گذريل سال جي مقابلي ۾ 36 ڪروڙ 40 لک ڊالر وڌيڪ آهي. عالمي مالي ادارن پاڪستان کي 1.25 ارب ڊالر ۽ مختلف ملڪن طرفان 80 ڪروڙ 76 لک ڊالر ڏنا.
دستاويز موجب، نئون پاڪستان سرٽيفڪيٽ ۾ 96 ڪروڙ 59 لک ڊالر جي سيڙپڪاري آئي. گذريل سال جي ابتدائي پنجن مهينن ۾ ٻاهرين قرض 2 ارب 66 ڪروڙ ڊالر حاصل ٿيو هو. عالمي بينڪ، اي ڊي بي، اسلامي ترقياتي بينڪ ۽ سعودي عرب سڀ کان وڌيڪ قرض فراهم ڪيو. پنجن مهينن ۾ حاصل ڪيل قرض جي پاڪستاني ڪرنسي ۾ ماليت 858 ارب 27 ڪروڙ رپيا آهي.
رپورٽ ۾ ڄاڻايو ويو آهي ته گذريل سال ساڳئي مدت ۾ حاصل ٿيندڙ 741 ارب رپين جي مقابلي ۾ 117 ارب رپيا وڌيڪ قرض حاصل ٿيو. نان پروجيڪٽ ايڊ جي مد ۾ 531 ارب رپين کان وڌيڪ قرض مليو، جنهن مان 273 ارب رپيا کان وڌيڪ بجٽ سپورٽ لاءِ ورتو ويو.
دستاويز موجب، اسلامي ترقياتي بينڪ 109 ارب رپين جو شارٽ ٽرم لون ڏنو، پنجن مهينن ۾ سعودي آئل فيسيلٽي جي صورت ۾ 141 ارب 76 ڪروڙ رپيا حاصل ٿيا، جيڪا سعودي آئل جي 50 ڪروڙ ڊالر جي برابر آهي. مختلف ترقياتي منصوبن لاءِ 327 ارب رپين کان وڌيڪ قرض حاصل ڪيو ويو.
دستاويز موجب، پاڪستان کي جولاءِ کان نومبر دوران 15 ارب 32 ڪروڙ رپيا جي گرانٽ ملي، ۽ موجوده مالي سال لاءِ مجموعي طور تقريبن 20 ارب ڊالر جي ٻاهرين مالي مدد جو اندازو لڳايو ويو آهي.
