ممبئي: بالي ووڊ جي مشهور اداڪار شرياس تلپڊي انڪشاف ڪيو آهي ته سپر اسٽار شاهه رخ خان ۽ فلمساز فرح خان ممبئي ۾ سندس پهريون گهر خريد ڪرڻ ۾ اهم مدد ڪئي، جنهن کي هو پنهنجي زندگيءَ جي يادگار واقعن مان هڪ قرار ڏئي ٿو.
ڀارتي ميڊيا موجب، فلمساز ۽ ڪوريوگرافر فرح خان پنهنجي ڪوڪنگ بلاگ لاءِ تازو شرياس تلپڊي جي گهر جو دورو ڪيو، جتي ٻنهي ماضي جون دلچسپ يادون تازيون ڪيون.
ان موقعي تي ڳالهائيندي شرياس تلپڊي چيو ته هو فلم “اوم شانتي اوم” جي ڪري ئي پنهنجو پهريون گهر خريد ڪرڻ ۾ ڪامياب ٿيو. سندس چوڻ هو ته جڏهن گهر خريد ڪرڻ لاءِ بينڪ کان قرض وٺڻ ويو ته شروعات ۾ کيس قرض ڏيڻ کان انڪار ڪيو ويو، ڇاڪاڻ ته هو قرض حاصل ڪرڻ جي مقرر ڪيل شرطن تي پورو نه لهندو هو.
شرياس ٻڌايو ته بينڪ ۾ موجود هڪ خاتون کانئس پڇيو ته هو هن وقت ڪهڙي فلم تي ڪم ڪري رهيو آهي. هن جواب ڏنو ته هو “اوم شانتي اوم” ۾ ڪم ڪري رهيو آهي. ان کان پوءِ خاتون پڇيو ته فلم جو مرڪزي اداڪار ڪير آهي ۽ هدايتڪار ڪير آهي. هن ٻڌايو ته فلم ۾ شاهه رخ خان مرڪزي ڪردار ادا ڪري رهيو آهي، جڏهن ته فلم جي هدايتڪار فرح خان آهي.
اداڪار موجب، بينڪ جي خاتون کيس چيو ته جيڪڏهن فلم جي حوالي سان تصديقي خط پيش ڪيو وڃي ته قرض جي درخواست تي ٻيهر غور ڪري سگهجي ٿو. ان کان پوءِ هن فرح خان سان رابطو ڪيو.
شرياس تلپڊي چيو ته فرح خان فوري طور سندس مدد ڪئي ۽ صرف ٻن ڏينهن اندر شاهه رخ خان کان ضروري سفارشي يا تصديقي خط وٺي ڏنو. سندس چوڻ هو ته جيئن ئي اهو خط بينڪ ۾ جمع ڪرايو ويو، ساڳئي شام سندس گهر واري قرض جي درخواست منظور ٿي وئي.
هن شاهه رخ خان ۽ فرح خان جو شڪريو ادا ڪندي چيو ته سندن تعاون سبب هو ممبئي جهڙي مهانگي شهر ۾ پنهنجو پهريون گهر خريد ڪرڻ جي خواب کي حقيقت بڻائي سگهيو.
واضح رهي ته “اوم شانتي اوم” سال 2007ع ۾ رليز ٿي هئي، جيڪا ان سال جي ڪامياب ترين فلمن مان هڪ هئي. فلم ۾ شاهه رخ خان سان گڏ ديپيڪا پڊوڪون مرڪزي ڪردار ادا ڪيو هو، جڏهن ته ڪيترن ئي مشهور اداڪارن پڻ فلم ۾ اهم ڪردار نڀايا هئا. هي فلم ديپيڪا پڊوڪون جي بالي ووڊ ۾ ڊيبيو فلم پڻ هئي، جنهن کيس وڏي شهرت ڏني.
