علائقي واسين جو چوڻ آهي ته اها پل ان وقت تعمير ڪئي وئي هئي، جڏهن ٽرئفڪ جو دٻاءُ وڌڻ ۽ حادثن جي واقعن سبب پراڻين پلن تي بار وڌي ويو هو. متبادل رستي جي ضرورت محسوس ڪندي، هي پل تعمير ڪئي وئي، پر افسوس جو ڳالهه آهي ته انتظاميا جي بي ڌياني ۽ غير سنجيدگي سبب اها پل ڪڏهن به استعمال لائق نه ٿي سگهي.
مقامي ماڻهن جو وڌيڪ چوڻ آهي ته پل تي نه ته ڪا حفاظتي باڙ لڳائي وئي آهي ۽ نه ئي روڊ سان صحيح طرح ڳنڍي وئي آهي، جنهن سبب اها پل بيڪار بڻجي وئي آهي ۽ وقت سان گڏ ٽٽڻ لڳي آهي.
ڳوٺاڻن ضلعي انتظاميا کان مطالبو ڪيو آهي ته پل جو جائزو وٺي فوري طور تي ان جي مرمت ڪئي وڃي، حفاظتي انتظامات ڪيا وڃن ۽ روڊن سان ڳنڍي آمدورفت لاءِ کوليو وڃي، جيئن وسيلن جو ضايع ٿيڻ روڪي عوام ان مان فائدو وٺي سگهي.
سندن چوڻ هو ته اڻپورو منصوبو نه رڳو قومي خزاني جو زيان آهي، پر عوام سان ناانصافي به آهي.
