سنڌ جي آبپاشي واري وزير ڄام خان شورو سيڪريٽري آبپاشي ظريف کهيڙو سان گڏ سکر بئراج جو دورو ڪيو،

جتي هن بئراج تي هلندڙ دروازن جي تبديلي واري ڪم جو تفصيلي جائزو ورتو. ان موقعي تي لاڳاپيل عملدارن پاران کين بريفنگ پڻ ڏني وئي. ميڊيا سان ڳالهائيندي صوبائي وزير آبپاشي ڄام خان شورو چيو ته سنڌ بئراج امپروومنٽ پروجيڪٽ تحت سکر بئراج جا 26 دروازا اڳ ئي تبديل ڪيا ويا آهن، جڏهن ته هن سال وڌيڪ 27 دروازا تبديل ڪيا ويندا. هن چيو ته بئراج جي سؤ سالن جي تاريخ ۾ پهريون ڀيرو پوري اسٽرڪچر کي مڪمل طور چيڪ ڪري مرمتي ڪم ڪيو پيو وڃي. هن منصوبي تحت نه رڳو سکر بئراج جا سمورا 55 دروازا، پر ان سان لاڳاپيل ڪينالن جا به 55 دروازا تبديل ڪيا ويندا، جنهن تي مجموعي طور 17 ارب رپيا خرچ ڪيا پيا وڃن. ڄام خان شورو ٻڌايو ته سکر بئراج جي وچ وارن 30 دروازن تي هميشه وڌيڪ پاڻي جو دٻاءُ رهي ٿو ۽ لڳ ڀڳ 70 سيڪڙو پاڻي انهن ئي دروازن مان وهي ٿو. هن ڀيري دروازن سان گڏ بئراج جي فرش جو به تفصيلي معائنو ۽ مرمت ڪئي پئي وڃي. هن چيو ته گيٽ نمبر 15 کان 22 جي وچ ۾ ڪوفر ڊيم تعمير ڪيو ويو آهي، جڏهن ته بئراج مان سلٽ ڪڍڻ جو ڪم به جاري آهي، جنهن لاءِ الڳ طور 4 ارب رپيا مختص ڪيا ويا آهن. صوبائي وزير وڌيڪ چيو ته هن سال به 6 جنوري کان 20 جنوري تائين صفائي ڪئي ويندي، جنهن دوران ڪينالن جي ڊي سلٽنگ جو عمل مڪمل ڪيو ويندو. هن ٻڌايو ته برطانوي دور ۾ به ڊي سلٽنگ سبب بئراج جي راڪيٽ پاڪٽ جا 10 دروازا بند ڪيا ويا هئا. هن چيو ته بئراج جي اپ اسٽريم ۾ سؤ سالن بعد هڪ ديوار سامهون آئي آهي، جيڪا ماضي ۾ پاڻي جي دٻاءُ کي گهٽ ڪرڻ لاءِ تعمير ڪئي وئي هئي. ڄام خان شورو جو چوڻ هو ته موسمياتي تبديلي هڪ حقيقت آهي، جنهن سبب پاڻي جي وهڪري ۾ نمايان تبديلي آئي آهي، ۽ سنڌ حڪومت انهن چيلينجن سان منهن ڏيڻ لاءِ عملي قدم کڻي رهي آهي. هن چيو ته سنڌ جي 80 سيڪڙو زراعت جو دارومدار سکر بئراج تي آهي، ۽ ماهرن موجب جاري بحالي ۽ مرمتي ڪمن سان بئراج جي عمر ۾ گهٽ ۾ گهٽ 30 سال واڌارو ٿيندو. ان موقعي تي پروجيڪٽ ڊائريڪٽر پريتم داس، سکر بئراج جو چيف انجنيئر اڪرام الله قريشي ۽ ٻيا لاڳاپيل عملدار پڻ وزير آبپاشي سان گڏ هئا