اسلام آباد: نادرا پاران چهري جي سڃاڻپ تي ٻڌل بائيو ميٽرڪ تصديقي سهولت شروع ڪري ڏني وئي آهي، جنهن سان وڏن ماڻهن يا طبي مسئلن سبب شهري فنگرپرنٽس جي تصديق ۾ پيش ايندڙ مشڪل ختم ٿي ويندي.
نادرا پاران جاري ڪيل اعلامي ۾ چيو ويو آهي ته وزيراعظم ۽ وزير داخلا جي هدايتن تي نادرا ڪيترائي اقدام کنيا آهن، قومي سڃاڻپ ڪارڊ قانونن ۾ ترميم ذريعي بائيو ميٽرڪ جي تعريف وسيع ڪئي وئي آهي.
اعلامي ۾ ٻڌايو ويو آهي ته چهري جي سڃاڻپ تي ٻڌل بائيو ميٽرڪ تصديقي سهولت شروع ٿي وئي آهي، ۽ “پاک آءِ موبائل” ايپ تي به چهري جي سڃاڻپ ذريعي بائيو ميٽرڪ تصديق جي سهولت مهيا ڪئي وئي آهي. 20 جنوري کان نادرا مرڪزن ۾ چهري جي سڃاڻپ تي ٻڌل بائيو ميٽرڪ تصديقي سرٽيفڪيٽ جاري ڪيو ويندو.
نادرا جو چوڻ آهي ته شهري ضرورت پوڻ تي معمولي فيس جي عيوض سرٽيفڪيٽ حاصل ڪري سگهن ٿا، جيڪڏهن فنگرپرنٽس تصديق نه ٿين ته شهري ويجهي نادرا رجسٽريشن سينٽر وڃن، چهري جي سڃاڻپ جي عمل مڪمل ٿيڻ بعد نادرا هڪ سرٽيفڪيٽ جاري ڪندو، جنهن تي تصوير، سڃاڻپ ڪارڊ نمبر، نالو، والديت، منفرد ٽريڪنگ آءِ ڊي ۽ QR ڪوڊ هوندو، ۽ اهو سرٽيفڪيٽ 7 ڏينهن لاءِ استعمال لائق هوندو.
اعلامي موجب، نادرا هن نظام جي نفاذ لاءِ مڪمل طور تي تيار آهي، ۽ متعلق سرڪاري ۽ نجي ادارن کان ضروري اقدام وٺڻ جي درخواست ڪئي وئي آهي. 20 جنوري کان پوءِ هن سهولت جي دستيابي بابت شڪايت ٿيڻ تي متعلق ادارو يا محڪمو شڪايت جو جواب ڏيندو. ڊجيٽل آءِ ڊي جي جاري ٿيڻ بعد اها سهولت “پاک آءِ ڊي موبائل” ايپ تي به موجود هوندي.
