وينزويلا تي آمريڪا جو حملو، صدر نکولس مادورو ۽ انهن جي زال سيليا فلورس جو اغوا سامراجي جارحيت آهي. هي دنيا جي سڀني قانونن ۽ اصولن جي خلاف کليل جارحيت آهي. اسان ان جي مذمت ڪريون ٿا. انهن کي فوري طور باعزت ڇڏڻ سان پنهنجو ملڪ واپس آندو وڃي.
هي ڳالهه ڪميونسٽ پارٽي آف پاڪستان سکر جي ضلعي سيڪريٽري ۽ پاپولر ليفٽ الائنس سکر جي ڪنوينر شفاعت گھنگھري، ملڪ کوسي، پروگريسو رائيٽرز ايسوسيئيشن سکر جي سيڪريٽري سردار پيرزادي، ايس اي سنگت برانچ سکر، مجيد نواز مغل، عوامي تحريڪ مهراڻ سومري، پجاري اڳواڻ ڊاڪٽر علي منگر، ڊاڪٽر عبدالمجيد ۽ ٻين خطاب ڪندي چيو.
سکر پريس ڪلب جي اڳيان احتجاجي مظاهري دوران غلام رسول گھمري، لال شيخ عباس سومري، غلام رسول سهاگ، سعيد اختر، سنڌ هاري ڪميٽي جا اڳواڻ ذبيح الله جتوئي، شکور مہر ۽ پاپولر ليفٽ الائنس جا اڳواڻ خطاب ڪندي مظاهرو ڪيو.
واضح رهي ته پاپولر ليفٽ الائنس آمريڪا جي هن غنڊاگردي جي خلاف ملڪ ۾ احتجاجي مظاهرن جي ڪال ڏني آهي.
مقررين وڌيڪ چيو ته دنيا جي هر هنڌ، جتي تيل، گئس ۽ قدرتي معدنيات موجود آهن، اتي سامراجي طاقتوں جي وچ ۾ پراکسي وار جاري آهي. آمريڪا هر هنڌ سازش ڪري ٿو ۽ ڪرپٽ فوجي جنرلز جي ذريعي حڪومتن کي تبديل ڪري ٿو. جتي لالچي ۽ غدار جنرل نٿا ملن، اتي آمريڪا وينزويلا وانگر ڪم ڪري ٿو. آمريڪا عراق، ليبيا ۽ ٻين ملڪن وانگر تيل حاصل ڪرڻ لاءِ خونريز جنگون ڪري پنهنجي مقصد حاصل ڪري ٿو.
اڄ دنيا انتهائي غير محفوظ ٿي چڪي آهي. دنيا ۾ ڪا به طاقت اهڙي ناهي جيڪا آمريڪي سامراجي عمل کي روڪي سگهي.
اسان سڀ وينزويلا جي ترقي پسند، محب وطن ۽ قوم پرست عوام سان پنهنجي مضبوط يڪجهتي جو اظهار ڪريون ٿا. ان موقع تي آمريڪا جي خلاف شديد نعرا بازي ڪئي وئي ۽ ڌرڻو پڻ ڏنو ويو.
