گرم مشروب، جهڙوڪ چانهه ۽ ڪافي، سياري جي موسم ۾ ڪيترن ماڻهن جي پسنديده هوندا آهن، پر جيڪڏهن اهي تمام گهڻو گرم پيئيا وڃن ته غذائي نالي (Esophagus) جي ڪينسر جو خطرو وڌائي سگهن ٿا۔
تحقيق موجب جيڪڏهن چانهه ۽ ڪافي تمام تيز گرمي تي پيئبي ته اها صحت لاءِ نقصانڪار ثابت ٿي سگهي ٿي۔ مختلف ملڪن ۾ ڪيل وڏين تحقيقن مان معلوم ٿيو آهي ته جيڪي ماڻهو 65 ڊگري سيلسيس کان وڌيڪ گرمي تي چانهه يا ڪافي پيئن ٿا، انهن ۾ غذائي نالي جي ڪينسر جو خطرو وڌيڪ ڏٺو ويو آهي، خاص طور تي انهن جي ڀيٽ ۾ جيڪي اهي مشروب معتدل گرمي تي پيئن ٿا۔
ماهرن جو چوڻ آهي ته انتهائي گرم مشروب غذائي نالي جي نازڪ اندروني جھلي کي نقصان پهچائي سگهن ٿا، جنهن سبب دائمي سوزش (Chronic Inflammation) پيدا ٿي سگهي ٿي ۽ وقت سان گڏ خليات کي نقصان پهچڻ جو امڪان وڌي وڃي ٿو۔
اگرچه اڃا تائين هن تعلق کي غذائي نالي جي ڪينسر جي حتمي سبب طور تسليم ناهي ڪيو ويو، پر ورلڊ هيلٿ آرگنائيزيشن (WHO) انتهائي گرم مشروب کي ممڪن ڪينسر پيدا ڪندڙ عنصرن ۾ شامل ڪيو آهي۔
ان کان علاوه، ٻين مطالعي مان اهو به معلوم ٿيو آهي ته معتدل گرمي تي چانهه ۽ ڪافي جو محدود استعمال ڪجهه سر ۽ ڳچيءَ جي ڪينسرن، خاص طور تي ڳلي جي ڪجهه حصن جي ڪينسر جي خطري کي گهٽائي سگهي ٿو۔ بهرحال، اهي نتيجا اڃا ابتدائي آهن ۽ وڌيڪ تحقيق جي ضرورت آهي۔
