سائنسدانن برفاني براعظم انٽارڪٽيڪا جي برفاني تهه هيٺ لڪل هڪ “خفيه دنيا” دريافت ڪري ورتي آهي.
ها، واقعي سائنسدانن انٽارڪٽيڪا جي ٿلهي برفاني تهه هيٺ موجود اسرارن تي روشني وجهندي ٻڌايو آهي ته اتي ڇا لڪل آهي.
سائنسدانن انٽارڪٽيڪا جي برفاني تهه هيٺ موجود علائقي جو تفصيلي نقشو تيار ڪيو آهي.
هي برفاني تهه لڳ ڀڳ 14 ڪلوميٽر ٿلهي آهي، ۽ ان جي هيٺ موجود علائقي بابت سائنسدانن کي مريخ يا زهره جهڙن سيارن جي مٿاڇري کان به گهٽ ڄاڻ هئي.
ان جو سبب اهو آهي ته برف سبب هيٺ موجود سطح جو مشاهدو ڪرڻ ڏکيو هوندو آهي.
هاڻي سيٽلائيٽ ڊيٽا ۽ جديد ميپنگ ٽيڪنيڪن جي مدد سان هن وقت تائين جو سڀ کان وڌيڪ تفصيلي نقشو تيار ڪيو ويو آهي.
هن نقشي ۾ هزارين ٽڪريون، واديون، پهاڙي سلسلا ۽ گهريون کاهيون هجڻ جو انڪشاف ٿيو آهي.
ماهرن موجب، اهي تفصيل انٽارڪٽيڪا جي برفاني سطح جي روين بابت ڄاڻ حاصل ڪرڻ ۾ مدد ڏينديون، جيڪا موسمي تبديلي سبب تيزي سان پگهرجي رهي آهي.
ايڊنبرگ يونيورسٽي جي اسڪول آف جيو سائنسز جي ماهرن هن تحقيق تي ڪم ڪيو.
ماهرن ٻڌايو ته لکين ورهين کان انٽارڪٽيڪا جي برفاني تهه اهڙي علائقي مٿان ڄمي ويئي آهي، جيڪو هموار ميدانن، پهاڙي سلسلن ۽ ٻين جاگرافيائي خاصيتن سان ڀرپور آهي.
انهن وڌيڪ ٻڌايو ته هن ٽيڪنيڪ جي ذريعي پهريون ڀيرو هن برفاني براعظم جي لڪل جاگرافي بابت ڄاڻ حاصل ڪرڻ ممڪن ٿي ويو آهي.
هن تحقيق لاءِ “آئس فلو پرٽربيشَن اينالائسس” نالي ميپنگ ٽيڪنيڪ استعمال ڪئي وئي، جنهن کي سيٽلائيٽ ڊيٽا سان گڏايو ويو.
محققن موجب، هن نئين طريقيڪار سان انٽارڪٽيڪا جي لڪل رازن بابت ڄاڻ حاصل ڪرڻ ۾ وڏي مدد ملي آهي.
هن تحقيق جا نتيجا جرنل “سائنس” ۾ شايع ڪيا ويا آهن.
