ايران ۾ مهانگائي خلاف جاري پرتشدد احتجاج وڌيڪ شدت اختيار ڪري ويو آهي، جتي تازن مظاهرن دوران مظاهرين جي فائرنگ سبب 2 سيڪيورٽي اهلڪار مارجي ويا جڏهن ته 30 زخمي ٿي پيا آهن.
ايراني خبر ايجنسي فارس نيوز موجب، احتجاج ان وقت پرتشدد شڪل اختيار ڪئي جڏهن لردگان شهر ۾ دڪاندارن پنهنجون دوڪانون بند ڪري وڏي انگ ۾ روڊن تي نڪري آيا ۽ حڪومت خلاف سخت نعريبازي ڪئي.
رپورٽ موجب احتجاج دوران مظاهرين پوليس تي پٿراؤ ڪيو، جڏهن ته ڪجهه مظاهرين سيڪيورٽي اهلڪارن تي فائرنگ پڻ ڪئي، جنهن جي نتيجي ۾ 2 اهلڪار فوت ۽ 30 زخمي ٿي پيا.
ايراني ميڊيا مطابق لردگان شهر ۾ مظاهرين گورنر جي آفيس ۽ ٻين سرڪاري عمارتن کي به نقصان پهچايو.
ٻئي طرف، سرحدي صوبي اتر خراسان جي شهر بجنورد ۾ هڪ دوڪان کي باهه لڳائي وئي، پر سيڪيورٽي اهلڪارن بروقت ڪارروائي ڪندي ويجهو بيٺل هڪ شهري جي گاڏي کي محفوظ هنڌ منتقل ڪري باهه کان بچائي ورتو.
حڪام موجب صورتحال تي ضابطو آڻڻ لاءِ متاثر علائقن ۾ سيڪيورٽي فورسز جي اضافي نفري مقرر ڪئي وئي آهي.
ياد رهي ته ايران ۾ مهانگائي خلاف احتجاجي مظاهرا گذريل 11 ڏينهن کان جاري آهن، ۽ ان دوران جهڙپن ۾ مارجي ويل ماڻهن جو انگ 35 ٿي چڪو آهي.
آمريڪي ميڊيا موجب تهران، شيراز ۽ اولهه وارن علائقن ۾ به احتجاجي مظاهرا ڪيا ويا، جن دوران لڳ ڀڳ 1200 ماڻهن کي گرفتار ڪيو ويو.
ايراني ميڊيا موجب مظاهرن ۾ تقريباً 250 پوليس اهلڪار ۽ بسيج فورس جا 45 اهلڪار زخمي ٿيا، جڏهن ته ايراني پرڏيهي وزارت جو چوڻ آهي ته آمريڪا ۽ اسرائيل ايران جي اندروني معاملن ۾ مداخلت ڪري تشدد کي هٿي ڏئي رهيا آهن.
