ڪراچي پوليس هن سال جي سڀ کان وڏي ڪارروائي ڪندي 100 کان وڌيڪ ٻارن سان زيادتي ۾ ملوث مرڪزي جوابدار کي سندس ساٿي سميت گرفتار ڪرڻ جو دعويٰ ڪيو آهي.
ايس پي انويسٽيگيشن عثمان سدوزئي دعويٰ ڪيو آهي ته متاثر ٻار جي نشاندهي تي ٽيپو سلطان واري علائقي ۾ ڪارروائي ڪئي وئي، گرفتار جوابدارن ۾ مرڪزي جوابدار عمران ۽ وقاص خان شامل آهن. جوابدار 100 کان وڌيڪ ٻارن سان زيادتي ۾ ملوث رهيا آهن، جڏهن ته پوليس وٽ 2020 کان 2025 تائين 7 شڪايتون رپورٽ ٿيون هيون.
مختلف ضلعن جي ڪيسن ۾ ڊي اين اي هڪ ئي شخص جو نڪتو: پوليس
هن ٻڌايو ته مختلف ضلعن جي ڪيسن ۾ ڊي اين اي هڪ ئي شخص جو مليو، ۽ ڇهن سالن دوران الڳ الڳ ڪيسن ۾ ساڳيو ڊي اين اي ملڻ بعد جاچ ڪئي وئي. انهن سڀني ڪيسن ۾ 12 کان 13 سال عمر جي ڇوڪرن کي زيادتي جو نشانو بڻايو ويو، جڏهن ته هڪ ڪيس ۾ ٻار سان ٻن کان وڌيڪ ماڻهن زيادتي ڪئي. داخل ٿيل سڀني 7 ايف آءِ آرن ۾ جوابدار جو ڊي اين اي ميچ ٿي ويو آهي.
عثمان سدوزئي جو چوڻ هو ته ايڊیشنل آءِ جي ڪراچي آزاد خان 6 جنوري تي ٽيم ٺاهي هئي، جيڪا ڊي آءِ جي سي آءِ اي مقدس حيدر جي سربراهي ۾ ڪم ڪري رهي هئي. هن ٽيم 11 ڏينهن اندر انتهائي گهربل جوابدارن کي گرفتار ڪيو. مرڪزي جوابدار عمران منظور ڪالوني جو رهواسي آهي ۽ پنڪچر جو ٺهيو هلائيندو هو. هن ڪيس ۾ گرفتار مرڪزي جوابدار عمران ڇهن سالن دوران درجنين ٻارن سان زيادتي ڪرڻ جو اعتراف ڪيو آهي. عمران سڀني ٻارن کي ملير ندي جي ڀرسان وٺي وڃي زيادتي ڪندو هو ۽ موٽرسائيڪل جو لالچ ڏئي ٻارن کي ساڻ وٺي ويندو هو.
ٽن ڪيسن ۾ ٻارن جوابدار عمران کي سڃاڻي ورتو: ايس پي
ايس پي موجب ٽن ڪيسن ۾ ٻارن جوابدار عمران کي سڃاڻي ورتو آهي، جڏهن ته هڪ ڪيس ۾ ٻار عمران ۽ سندس ساٿي وقاص خان کي به سڃاتو. هڪ ڪيس ۾ جوابدار ٻار کي وقاص سان گڏ سرجاني وٺي ويو، جتي ٻار شور مچايو ته ٻئي جوابدار موقعو تان فرار ٿي ويا.
جاچ ٽيم کي ايوارڊ پڻ ڏنو ويندو: آءِ جي سنڌ
ٻئي طرف آءِ جي سنڌ جو چوڻ آهي ته جاچ ٽيم جوابدارن کي گرفتار ڪيو ۽ ڪيس جي سائنسي بنيادن تي جاچ ڪئي وئي. ڪيترن ئي ڪيسن ۾ ساڳيو ڊي اين اي اچڻ بعد ٽيم جوڙي وئي، ۽ جاچ ٽيم کي ايوارڊ پڻ ڏنو ويندو.
ان کان علاوه، وزيراعليٰ سنڌ مراد علي شاهه هدايت ڪئي آهي ته جوابدارن خلاف مضبوط شاهدن جي بنياد تي ڪيس عدالت ۾ پيش ڪيو وڃي، جڏهن ته ايڊیشنل آءِ جي ڪراچي کي روزاني بنياد تي ڪيس جي اڳڀرائي بابت آگاهه ڪيو وڃي.
وزيراعليٰ سنڌ چيو ته ٻارن سان زيادتي ناقابل قبول آهي، ۽ پوليس جوابدارن کي سزا ڏيارڻ لاءِ هر ممڪن قدم کڻي.
