ڪراچي: هلندڙ مالي سال جي پهرين ڇهه مهينن دوران ملڪي برآمدات ۾ نمايان گهٽتائي رڪارڊ ڪئي وئي آهي، جنهن سبب ملڪ جي واپار ۽ معيشت کي وڏو ڌڪ لڳو آهي. ماهرن هن رجحان کي ڳڻتي جوڳو قرار ڏيندي سرڪاري سطح تي فوري قدم کڻڻ تي زور ڏنو آهي.
سرڪاري انگن اکرن موجب، ملڪ جي مختلف شعبن جي برآمدات ۾ نمايان گهٽتائي ٿي آهي. غذائي شين جي برآمدات ۾ 40.29 سيڪڙو گهٽتائي آئي، جنهن بعد ان جو مقدار 2 ارب 36 ڪروڙ ڊالرن تائين محدود ٿي ويو، جڏهن ته گذريل مالي سال جي پهرين ڇهه مهينن دوران غذائي شين جي برآمدات لڳ ڀڳ 4 ارب ڊالر هئي.
اهڙي طرح چانورن جي برآمدات ۾ 49.90 سيڪڙو، ڀاڄين جي برآمدات ۾ 36.80 سيڪڙو، مقامي سڪايل ميون جي برآمدات ۾ 63.78 سيڪڙو ۽ پلاسٽڪ جي سامان جي برآمدات ۾ 43.66 سيڪڙو گهٽتائي رڪارڊ ڪئي وئي.
فارماسيوٽيڪل شين جي برآمدات ۾ 28.67 سيڪڙو ۽ ٽرانسپورٽ سامان جي برآمدات ۾ 36.51 سيڪڙو گهٽتائي ڏٺي وئي. ان جي ابتڙ، ٽيڪسٽائل شعبي پنهنجي برآمدات ۾ معمولي واڌ برقرار رکڻ ۾ ڪامياب رهيو، ۽ هن عرصي دوران ٽيڪسٽائل برآمدات جو مقدار 9 ارب 16 ڪروڙ ڊالرن تائين پهچي ويو. بهرحال، مجموعي برآمدات ۾ گهٽتائي سبب معيشت تي دٻاءُ برقرار آهي.
ماهرن موجب، برآمدات ۾ گهٽتائي جا بنيادي سبب عالمي طلب ۾ گهٽتائي، برآمدي لاڳت ۾ واڌ، لاجسٽڪ ۽ مارڪيٽ تائين رسائي جا مسئلا، ۽ عالمي منڊين ۾ وڌندڙ مقابلي جو دٻاءُ آهن.
