ايران آمريڪا جنگ سبب ٻين ملڪن جيان پاڪستان ۾ به وچ اوڀر ۾ فضائي آپريشن سخت متاثر ٿي ويو آهي.
تفصيل موجب ٽن ڏينهن دوران ملڪي، پرڏيهي ايئر لائينز جون 500 کان وڌيڪ اڏامون ملتوي ٿيون، هزارين مسافر ڦاسي ويا جڏهن ته مسافر سان گڏوگڏ ايئر ڪارگو سروس به معطل ٿي وئي.
مختلف نوعيت جو سامان جنهن ۾ کاڌي پيتي جي شين کان وٺي ٻيون شيون به شامل آهن. اهي به رڪجي چڪيون آهن، اڏامون ڪڏهن بحال ٿينديون اها صورتحال اڃان تائين واضح نه ٿي سگهي آهي.
پاڪستان ايئرپورٽ اٿارٽي مان ملندڙ انگن اکرن موجب پاڪستان جي مختلف ايئر پورٽس تان ايندڙ ۽ ويندڙ مختلف ايئر لائينز جون پنج سئو کان وڌيڪ اڏامون ملتوي ٿي چڪيون آهن. جڏهن ته ڪارگو سروس معطل ٿيڻ سان عام واهپي جي شين جي ورهاست سبب ٻين شين جي ورهاست به معطل ٿي وئي آهي
ايئر پورٽ ذريعن موجب ڪجهه ملڪن جي فضائي حدن جي بندش سبب فضائي آپريشن معطل ٿيو آهي. ڪڏهن بحال ٿيندو انهي جي باري ۾ هن وقت ڪجهه نٿو چئي سگهجي، پاڪستان جي مختلف ايئرپورٽس تان صرف سعودي عرب جي لاءِ اڏامن جي آمد رفت جاري آهي جيڪڏهن صورتحال اهڙي رهي يا وڌيڪ حالتون خراب ٿيون ته پوءِ فضائي آپريشن وڌيڪ خراب ٿي ويندو. ٽريول ايجنٽس ايسوسيئيشن جي سينئر اڳواڻ خواجه ايوب نسيم موجب خوف حراس سبب عمزه زائرين به وڃڻ کان ڊڄي رهيا آهن. ڪيترائي عمرو ڪندڙ زائرين سڌو سنئون دبئي جون ٽڪيٽون بڪ ڪرائي رکيون آهن، ٽڪيٽون ته ريفنڊز ٿي وينديون آهن پر هوٽل جي بڪنگ ريفنڊ ناهي ٿيندي جيڪڏهن صورتحال اهڙي رهي ته ٽريولز ايجنٽس کي ڪروڙين روپين جو نقصان ٿيندو.
