اڏيرولال لڳ ڳوٺ قيصر سيهڙو اسٽاپ وٽ هڪ افسوسناڪ واقعو پيش آيو آهي

جتي تيار بيٺل ڪڻڪ جي فصل کي باهه لڳڻ ڪري ڏيڍ ايڪڙ فصل سڙي رک ٿي ويو. باهه لڳڻ سبب غريب هاريءَ جي سال جي محنت ضايع ٿي وئي، جنهن بعد علائقي ۾ ڏک جي لهر پکڙجي وئي آهي.
​مليل ڄاڻ موجب، قيصر سيهڙو اسٽاپ ويجهو وڏيري غني هنڱوري جي زرعي زمين، جنهن تي هاري هشو ڪولهي محنت ڪري ڪڻڪ جو فصل تيار ڪيو هو، تنهن کي اوچتو باهه وڪوڙي ورتو. ٻڌايو پيو وڃي ته ويجهو پيل ڪماند جي ڪچري کي لڳل باهه تيز هوا سبب اوچتو ڪڻڪ جي فصل تائين پهچي وئي، جنهن ڏسندي ئي ڏسندي ڏيڍ ايڪڙ تي بيٺل سنهري ڪڻڪ کي پنهنجي لپيٽ ۾ آڻي ڇڏيو.
​باهه لڳڻ کانپوءِ غريب هاري هشو ڪولهي پنهنجي تيار فصل کي سڙندي ڏسي مٿي تي هٿ رکي ويهي رهيو ۽ زار و قطار روئڻ لڳو. هاريءَ جو چوڻ هو ته:
​”منهنجي ٻارن جو گذر سفر هن فصل تي هو، رات ڏينهن هڪ ڪري فصل تيار ڪيو هو پر باهه سڀ ڪجهه کائي وئي. هاڻي مان پنهنجي ٻارن کي ڪٿان کارائيندس؟”
​علائقي واسين پنهنجي مدد پاڻ تحت باهه تي ضابطو آڻڻ جي ڪوشش ڪئي، پر تيسين تائين تيار فصل سڙي مڪمل طور تي تباھ ٿي چڪو هو. ڳوٺاڻن ۽ متاثر هاريءَ حڪومت سنڌ ۽ چونڊيل نمائندن کان گهر ڪئي آهي ته غريب هاريءَ جي واهر ڪئي وڃي ۽ کيس ٿيل نقصان جو معاوضو ڏنو وڃي ته جيئن هو پنهنجي خاندان جو پيٽ پالي سگهي