پارليامينٽ جي گڏيل اجلاس کي خطاب ڪندي صدر آصف علي زرداري چيو ته ڀارتي قبضي کان ڪشمير جي آزادي تائين ڏکڻ ايشيا محفوظ نٿو ٿي سگهي. پاڪستان ڪنهن به ملڪي يا پرڏيهي کي پنهنجي امن کي غير مستحڪم ڪرڻ جي لاءِ ڪنهن پاڙيسري ملڪ جي زمين استعمال ڪرڻ جي اجازت نه ڏيندو.
پارليامينٽ جو گڏيل اجلاس اسپيڪر اياز صادق جي صدارت هيٺ شروع ٿيو، وزيراعظم شهباز شريف به ايوان ۾ موجود آهي، پارليامينٽ جي هن خصوصي اجلاس ۾ صوبن جا وزيراعليٰ ۽ گورنر به شريڪ آهن. جڏهن ته پرڏيهي سفير به شريڪ آهن. اجلاس کان اڳ قومي ترانو وڄايو ويو، ڪلام پاڪ جي تلاوت ٿي، جنهن کان پوءِ صدر آصف علي زرداري پارليامينٽ جي گڏيل اجلاس کي خطاب ڪندي چيو ته بطور 2 ڀيرا چونڊيل صدر جي طور تي پارليامينٽ کي هي منهنجو نائون خطاب آهي. صدر چيو ته نئين پارلياماني سال جي شروعات تي اسان کي انهي ارادي کي اڳيان وڌائڻو آهي، قومن جو امتحان صرف بحران ۾ نه آهي، اهم موڙ تي به ٿيندو آهي. هن چيو ته جمهوريت جي طاقت آئين، عوامي ثابت قدمي، پارليامينٽ ۽ حڪومت جي ذميواري، هٿياربند فوج جي حوالي سان جڙيل آهي ملڪي خودمختياري جو تحفظ آئين جي حڪمراني ۽ معاشي ترقي کي هٿي ڏيڻ آهي. پنهنجن شهرين جي خوشحالي ۽ امن لاءِ ترقي ۽ استحڪام جو عمل اڳيان وڌائڻ آهي.
صدر چيو ته اڄ اسان انهن بنيادن تي بيٺل آهيون جنهن کي اسان جي قومي جدوجهد جي معمارن رکيو هو. قائداعظم اهڙي جمهوري رياست جو تصور پيش ڪيو جيڪا آئين ۽ قانون جي حڪمراني تي قائم هجي، شهيد ذوالفقار علي ڀٽو قوم کي گڏيل آئين ڏنو. هن چيو ته بينظير ڀٽو شهيد قرباني ۽ مثالي قيادت سان جمهوري عمل کي مضبوط ڪيو. پارليامينٽ جي بالادستي تي منهنجو ايمان صرف لفظن تائين محدود نه آهي، عملي قدمن مان ظاهر آهي ته سلامتي ڪونسل جي رپورٽ ۾ افغاني دهشتگردن کي علاقائي کان وڌي عالمي خطرو قرار ڏنو ويو آهي.
هن چيو ته پارليامينٽ کي هر خطاب جمهوريت جي تسلسل، آئين جي بالادستي ۽ قومي ذميواريءَ جي ياد ڏياريندڙ هوندو آهي. صدر چيو ته قومن جو امتحان رڳو بحرانن ۾ نه پر اهم موڙن تي به ٿيندو آهي، جڏهن ته جمهوريه جي طاقت آئين، عوام جي ثابت قدمي، پارليامينٽ، حڪومت جي ذميواري ۽ هٿياربند فوجن جي حوصلن ۾ مضمر آهي. نئين پارلياماني سال جي شروعات تي اسان کي ملڪ جي خودمختياري، آئين جي حڪمراني ۽ معاشي ترقي لاءِ عزم سان اڳتي وڌڻو پوندو.
صدر آصف علي زرداري چيو ته قائداعظم محمد علي جناح آئين ۽ قانون جي حڪمراني تي ٻڌل جمهوري رياست جو تصور ڏنو، شهيد ذوالفقار علي ڀٽو قوم کي متفقه آئين ڏنو، جڏهن ته شهيد محترمه بينظير ڀٽو پنهنجي قربانين سان جمهوري عمل کي مضبوط ڪيو. هن چيو ته پارليامينٽ جي بالادستي تي سندس ايمان رڳو لفظن تائين محدود ناهي، ڇو ته ماضي ۾ صدارتي اختيار پارليامينٽ کي واپس ڪيا ويا ۽ 18هين ترميم ذريعي صدر جو عهدو وفاق جي وحدت جي علامت بڻيو.
صدر ملڪ کي درپيش سيڪيورٽي چئلينجن جو ذڪر ڪندي چيو ته گذريل ڏهن مهينن دوران قوم پيچيده حالتن کي منهن ڏنو، پر جڏهن به قومي خودمختياري کي چيلينج ڪيو ويو ته پاڪستان صبر ۽ مضبوط عزم جو مظاهرو ڪيو. هن چيو ته ٻنهي سرحدن تي بلااشتعال حملن جو هٿياربند فوجن پيشاورانه مهارت سان جواب ڏنو. صدر آصف علي زرداري موجب 2025 پاڪستان لاءِ فيصلائتو سال ثابت ٿيو، جتي “معرڪهٔ حق” ۾ ڪاميابي صرف عسڪري نه پر قومي عزم جي فتح هئي. هن چيو ته ڀارتي جارحيت جو عسڪري ۽ سفارتي محاذن تي ڀرپور جواب ڏنو ويو ۽ عالمي برادري پاڪستان جي موقف کي تسليم ڪيو.
هن چيو ته والاريل ڄمون ۽ ڪشمير جي عوام جي منصفاڻي جدوجهد جي اخلاقي ۽ سفارتي حمايت جاري رهندي، ڇو ته ڪشمير مسئلو حل ٿيڻ کان سواءِ ڏکڻ ايشيا ۾ امن ممڪن ناهي. افغانستان بابت ڳالهائيندي صدر چيو ته دهشتگرد تنظيمن کي پناهه ڏيڻ خطي ۽ دنيا لاءِ خطرو آهي. پاڪستان هميشه سفارتڪاري کي ترجيح ڏني آهي ۽ جنگ کي آخري آپشن سمجهي ٿو، پر پنهنجي سرزمين تي حملا ڪنهن به صورت ۾ برداشت نه ڪيا ويندا. صدر ايران جي سپريم ليڊر آيت الله علي خامنہ اي جي شهادت تي تعزيت جو اظهار ڪندي چيو ته پاڪستان برادر ملڪ ايران جي خودمختياري ۽ علائقائي سالمت جي حمايت جاري رکندو ۽ خطي ۾ امن، تحمل ۽ ڳالهين تي زور ڏئي ٿو. هن چيو ته پاڪستان جا چين، آمريڪا، سعودي عرب، ترڪي ۽ ٻين دوست ملڪن سان لاڳاپا نون اوچائين ڏانهن وڌي رهيا آهن، جڏهن ته سي پيڪ فيز ٽو ملڪ جي بنيادي ڍانچي ۽ معيشت ۾ انقلاب آڻيندو.
صدر پاڻيءَ جي مسئلي کي اسٽرٽيجڪ خطرو قرار ڏيندي چيو ته سنڌ طاس معاهدي جي ڀڃڪڙي آبي دهشتگردي آهي ۽ پاڪستان پنهنجي پاڻيءَ جي حق جو دفاع بين الاقوامي قانون تحت ڪندو. معاشي صورتحال تي ڳالهائيندي صدر چيو ته معاشي استحڪام ۽ قومي سلامتي هڪ ٻئي سان جڙيل آهن. ٽيڪس سسٽم ۾ سڌارا، شفافيت، ٽيڪنالاجي، صاف توانائي، زراعت، سماجي تحفظ ۽ عورتن جي بااختياري حڪومت جون اهم ترجيحات آهن. خطاب جي آخر ۾ صدر چيو ته نئين پارلياماني سال ۾ خودمختياري جو تحفظ، دهشتگردي جو خاتمو، معاشي ترقي، روزگار جا موقعا ۽ وفاقي هم آهنگي کي يقيني بڻائڻ لازمي آهي، ۽ قوم کي آزمائش جي وقت ۾ اتحاد برقرار رکڻ گهرجي.
