اڏيرولال ۽ ان جي مضافاتي علائقن ۾ پيئڻ جي صاف پاڻي جو بحران شدت اختيار ڪري ويو آهي.

قامي ماڻهن جو چوڻ آهي ته گذريل ڪجهه عرصي کان جر جو پاڻي نه صرف کارو ٿي چڪو آهي، پر ان مان بدبوءِ پڻ اچي رهي آهي. پاڻي جي فلٽريشن ۽ فراهمي جا پراڻا منصوبا ناڪاره ٿي چڪا آهن، جنهن ڪري شهري مجبور ٿي اهو ئي گندو پاڻي استعمال ڪري رهيا آهن. ​خراب پاڻي جي استعمال سبب علائقي ۾ پيٽ، جگر، چمڙي جي بيمارين ۽ هيپاٽائيٽس جهڙن موذي مرضن خطرناڪ حد تائين منهن ڪڍيو آهي. خاص ڪري معصوم ٻارڙا ۽ بزرگ ان صورتحال جو وڌيڪ شڪار ٿي رهيا آهن. مقامي اسپتالن ۾ روزانو درجنين مريض پاڻي مان پيدا ٿيندڙ بيمارين سبب رپورٽ ٿي رهيا آهن.
​علائقي واسين صحافين سان ڳالهائيندي دانهيو ته:
​”پبلڪ هيلٿ کاتي کي بار بار شڪايتن باوجود ڪي به جوڳا اپاءُ نه ورتا ويا آهن. اسان کي ائين ٿو لڳي ڄڻ کاتي جي آفيسرن کي اسان جي زندگين جي ڪا پرواهه ناهي. پيئڻ جي صاف پاڻي جي فراهمي سرڪار جي ذميواري آهي، پر هتي هر طرف بي حسي جو راڄ آهي.”
​اڏيرولال جي سياسي، سماجي اڳواڻن ۽ شهرين سنڌ جي وڏي وزير، وزير بلديات ۽ سيڪريٽري پبلڪ هيلٿ کان مطالبو ڪيو آهي ته:
​اڏيرولال ۾ فوري طور تي نئين واٽر سپلاءِ اسڪيم جو اعلان ڪيو وڃي.
​ناڪاره بڻيل آر او پلانٽس (RO Plants) جي مرمت ڪرائي انهن کي چالو ڪيو وڃي.
​غفلت ڪندڙ آفيسرن خلاف سخت ڪارروائي ڪئي وڃي ته جيئن عوام کي پيئڻ جو صاف پاڻي ملي سگهي.
​شهرين چتاءُ ڏنو آهي ته جيڪڏهن جلد پيئڻ جي پاڻي جو مسئلو حل نه ڪيو ويو ته هو سخت احتجاج ڪندي روڊ بلاڪ ڪرڻ تي مجبور ٿيندا.