اسلام آباد: سابق ڊي جي آءِ ايس آءِ ليفٽيننٽ جنرل (رٽائرڊ) فيض حميد ملٽري ڪورٽ طرفان مليل سزا خلاف اپيل داخل ڪري ڇڏي آهي.
فيض حميد جي وڪيل ميان علي اشفاق تصديق ڪئي آهي ته فوجي عدالت جي فيصلي خلاف 27 ڊسمبر تي اپيل داخل ڪئي وئي آهي، جڏهن ته هن اپيل جي تفصيل ٻڌائڻ کان پاسو ڪيو آهي.
ياد رهي ته فيڊرل ڪورٽ مارشل، سابق ڊي جي آءِ ايس آءِ فيض حميد کي آفيسيل سيڪريٽ ايڪٽ جي ڀڃڪڙي، اختيارن جي ناجائز استعمال ۽ پاڪستان آرمي ايڪٽ جي خلاف ورزي جي الزام ۾ 14 ورهين قيد جي سزا ٻڌائي هئي.
ڊي جي آءِ ايس پي آر ليفٽيننٽ جنرل احمد شريف چوڌري 11 ڊسمبر تي پريس ڪانفرنس دوران ملٽري ڪورٽ پاران ڏنل سزا بابت آگاهه ڪيو هو. هن چيو هو ته 12 آگسٽ 2024 تي فيض حميد خلاف ملٽري ايڪٽ تحت جاچ شروع ڪئي وئي، جنهن کان پوءِ 15 مهينن جي تفتیش مڪمل ٿيڻ بعد سزا ٻڌائي وئي.
پاڪستان آرمي ايڪٽ جي دفعه 133-بي تحت سزا ۽ فيصلو ٻڌائڻ کان پوءِ، فيض حميد کي فيلڊ جنرل ڪورٽ مارشل جي فيصلي خلاف اپيل داخل ڪرڻ لاءِ 40 ڏينهن جي مهلت حاصل هئي.
قانون موجب، فوجي عدالت جي سزا خلاف داخل ڪيل اپيل جو جائزو آرمي چيف پاران مقرر ڪيل ڪورٽ آف اپيلز وٺندي، جنهن بعد آرمي چيف کي اختيار هوندو ته هو اپيل منظور ڪري، رد ڪري، معطل ڪري يا ان ۾ ترميم جا حڪم جاري ڪري.
ذريعن موجب، اپيل ۾ موقف اختيار ڪيو ويو آهي ته فيض حميد کي ڏنل سزا قانون جي ابتڙ ۽ غلط بنيادن تي ٻڌائي وئي، پراسيڪيوشن پنهنجو ڪيس ثابت ڪرڻ ۾ ناڪام رهي ۽ ڪيس جي شفاف ٽرائل کي به نظرانداز ڪيو ويو.
