ڊي آءِ جي ايسٽ جو ڏوهن جي خاتمي لاءِ سخت قدم کڻڻ جو حڪم، اسنيپ چيڪنگ ۽ سيڪيورٽي هاءِ الرٽ ڪراچي

ڊي آءِ جي ايسٽ زون ڪراچي ڊاڪٽر فرخ علي جي صدارت هيٺ 25 مارچ 2026 تي هفتيوار ڪرائيم ميٽنگ منعقد ڪئي وئي، جنهن ۾ ايسٽ زون جي سڀني ضلعن جي ايس ايس پيز ۽ انويسٽيگيشن ونگ جي آفيسرن شرڪت ڪئي۔
اجلاس دوران مختلف ٿاڻن ۾ هفتي دوران ٿيندڙ ڏوهن، ڏوهن جي روڪٿام بابت ڪارڪردگي، ۽ مفرور ۽ اشتهاري جوابدارن جي گرفتاري بابت تفصيلي رپورٽون پيش ڪيون ويون۔ ميٽنگ ۾ قتل، اقدام قتل، چوري، هائوس رابري، گاڏين جي چوري ۽ اسنيچنگ، منشيات خلاف ڪارروايون، غيرقانوني افغان باشندن جي گرفتاري ۽ اسٽريٽ ڪرائيم جي خاتمي بابت بريفنگ ڏني وئي۔
ڊي آءِ جي ايسٽ ڊاڪٽر فرخ علي هدايت جاري ڪندي چيو ته موجوده ملڪي حالتن کي نظر ۾ رکندي حساس هنڌن ۽ اهم عمارتن جي سيڪيورٽي جو ٻيهر جائزو ورتو وڃي، اسنيپ چيڪنگ وڌائي وڃي ۽ فوري رسپانس لاءِ ڪيو آر ايف (QRF) تيار ڪئي وڃي ته جيئن ڪنهن به هنگامي صورتحال کي اثرائتي نموني منهن ڏئي سگهجي۔
هن وڌيڪ هدايت ڪئي ته امڪاني برساتن کي نظر ۾ رکندي هيٺاهين علائقن ۽ مخصوص هنڌن جي نشاندهي ڪري رين ايمرجنسي ٽول ڪِٽس سان گڏ اهلڪار مقرر ڪيا وڃن، ته جيئن شهرين کي سهولت ملي سگهي ۽ ڪنهن به ممڪن نقصان کان بچاءُ يقيني بڻائي سگهجي۔
ڊي آءِ جي ايسٽ جو چوڻ هو ته عوام جي جان ۽ مال جو تحفظ پهرين ترجيح آهي ۽ شهر ۾ امن امان برقرار رکڻ لاءِ سڀ ممڪن قدم کنيا وڃن۔