تفصيل موجب جمعيت علماءِ اسلام ضلع سکر پاران وڌندڙ بدامني، لاقانونيت ۽ عوام جي عدم تحفظ خلاف شروع ڪيل “امن بحال ڪريو تحريڪ” جي پهرين پروگرام تحت سانگي ۾ احتجاجي مظاهرو ڪيو ويو۔
احتجاجي مظاهري کي خطاب ڪندي جمعيت علماءِ اسلام سنڌ صوبي جي ڊپٽي سيڪريٽري جنرل مولانا محمد صالح انڊھڙ چيو ته سنڌ خاص طور تي ضلع سکر ۾ روزانو قتل و غارتگري، ڦرون ۽ ٻيا سنگين ڏوهه عوام جي زندگي کي ڏکيو بڻائي ڇڏيو آهي، جڏهن ته ذميوار ادارا خاموش تماشائي بڻيل آهن۔
هن واضح ڪيو ته امن ۽ امان جي بحالي حڪومت جي اولين ۽ بنيادي ذميواري آهي، جنهن کان ڪنهن به صورت ۾ هٿ کڻي نٿو سگهجي۔ هن چيو ته جيستائين شهري پاڻ کي محفوظ محسوس نه ڪندا، تيستائين سماج ترقي نٿو ڪري سگهي۔ موجوده حالتن ۾ عوام عدم تحفظ جو شڪار آهي ۽ حڪومت طرفان اثرائتن قدمن جي کوٽ سخت ڳڻتي جوڳي آهي۔ جمعيت علماءِ اسلام عوام جي جان ۽ مال جي تحفظ لاءِ هر فورم تي آواز بلند ڪندي رهندي۔
احتجاجي مظاهري کي حافظ عبدالحميد مھر، مولانا علي اڪبر عباسي، مفتي ذبيح الله جتوئي، مولانا اظھر الحسين حسيني، حافظ ابو اسامه عباسي، مولانا عبدالوهـاب مھر ۽ ٻين عهديدارن ۽ علمائن پڻ خطاب ڪندي چيو ته امن ۽ امان جي مڪمل بحالي تائين “امن بحال ڪريو تحريڪ” جاري رهندي ۽ هن تحريڪ کي ضلعي ڀر ۾ منظم نموني سان ڦهلايو ويندو۔
هنن عوام، علمائن ۽ سماجي طبقن کي اپيل ڪئي ته هو هن جدوجهد ۾ جمعيت علماءِ اسلام جو ساٿ ڏين ته جيئن علائقي ۾ پائيدار امن قائم ٿي سگهي۔
مولانا محمد صالح انڊھڙ وڌيڪ چيو ته جمعيت علماءِ اسلام هڪ پرامن، منظم ۽ آئيني جدوجهد تي يقين رکي ٿي ۽ عوام جي حقن جي تحفظ لاءِ ڪنهن به قرباني کان پاسو نه ڪيو ويندو۔
