لاهور: (آچر: 29 مارچ 2026ع) پنجاب، خيبرپختونخواهه، ڪشمير، گلگت بلتستان ۽ اتر بلوچستان ۾ ڪنهن ڪنهن هنڌ تي تيز هوائن ۽ کنوڻ سان برسات پئي جڏهن ته ملڪ جي ٻين علائقن ۾ موسم خشڪ ۽ جهڙالو رهيو.
سڀني کان وڌيڪ برسات پنجاب ۽ مري ۾ پئي. رپورٽ موجب مري ۾ 40، لاهور، شادي پوره 43، تاج پوره 38، سگيان 37، جوهر ٽائون 34، پاني والا تالاب، 31، گلشن راوي 30، سمن آباد 30، نشتر ٽائون 29، جي روڊ 26، ايئرپورٽ 24، چوڪ ناخوده 23، هيڊ آفيس واسا 22، لڪشمي چوڪ 22، اپر مال، 15، مغل پوره، 15، جهلم، شيخو پوره 03، بهاولپور(سٽي 03 ليه ۽ ڪوٽ اردو ۾ 01 ملي ميٽر برسات پئي.
هوڏانهن خيبرپختونخواهه جي ضلعي بنون جي علائقي وريشمي ڪله منڊان ۾ تيز برسات سبب هڪ گهر جي ڇت ڪرڻ سبب افسوسناڪ واقعو پيش آيو جنهن جي نتيجي ۾ 3 ٻارڙا فوت جڏهن ته 2 زخمي ٿي پيا.
ريسڪيو ذريعن موجب شير محمد نالي شخص جي گهر جي ڇت اوچتو پٽ پئجي وئي جنهن جي نتيجي ۾ 3 ٻارڙا فوت جڏهن ته 3 زخمي ٿي پيا. ڇت ڪرڻ وقت ڪمري ۾ پنج ٻار موجود هئا. جيڪي ڇت ڪرڻ جي نتيجي ۾ ملبي هيٺيان دٻجي ويا جنهن تي ريسڪيو 1122 فوري ڪارروائي ڪندي امدادي آپريشن شروع ڪيو.
ريسڪيو اهلڪارن وقت تي ڪارروائي ڪندي ٻن زخمي ٻارن کي زنده ڪڍي ورتو جن کي شروعاتي طبي امداد کان پوءِ ڊسٽرڪٽ هيڊ ڪوارٽر اسپتال منتقل ڪيو ويو جتي انهن جو علاج جاري آهي، افسوسناڪ واقعي ۾ 2 نينگريون ۽ هڪ نينگر ملبي هيٺيان دٻجي فوت ٿي ويا. ريسڪيو ٽيمن فوت ٿي ويل ٻارن جا لاش ڪڍي ڊسٽرڪٽ هيڊ ڪوارٽر اسپتال منتقل ڪري ڇڏيا.
علائقي جي رهواسين موجب تازو برسات سبب ڪچن گهرن کي سخت نقصان پهتو آهي جڏهن ته اختيارين طرفان متاثر علائقن ۾ حفاظتي قدم وڌائڻ جو مطالبو ڪيو آهي.
