دوداپور: (آچر: 29 مارچ 2026ع) دوداپور ڀرسان اڻڄاتل هٿياربندن جي گهر تي جديد هٿيارن سان فائرنگ، 2 ڄڻا مارجي ويا، هڪ زخمي.
دوداپور ٿاڻي جي حد ۾ ڳوٺ محمد ملوڪ لهر ۾ اڻڄاتل هٿياربندن گهر تي جديد هٿيارن سان انڌا ڌنڌا فائرنگ ڪري ڏني، راڪيٽ لانچر فائر ڪرڻ جي نتيجي ۾ نينگري ساجدا لهر ۽ نوجوان صدام حسين لهر مارجي ويا، جڏهن ته نينگر محمد حنيف لهر سخت زخمي ٿي پيو. جنهن کي ڳڻتي جوڳي حالت ۾ لاڙڪاڻي اسپتال منتقل ڪيو ويو.
واقعي کان پوءِ مارجي ويلن جي وارثن ۽ لهر برادري پاران جيڪب آباد ڳڙهي خيرو روڊ تي ڌرڻو هنيو ويو روڊ بلاڪ ٿيڻ سبب ڪيتريون ئي گاڏيون بيهجي ويون، وارثن جو چوڻ هو ته اسان جي ڪنهن سان ڪابه دشمني ناهي ڏوهارين بنا ڪنهن جواز جي حملو ڪري 2 ڄڻا قتل ڪيا آهن، جوابدارن جي گرفتاري تائين اسان جو ڌرڻو جاري رهندو.
مقتولن جي ڀاء جو چوڻ آھي ته واپاري ارباب محمد صديق ۽ شريف ميرالي جو مون تي قرض آھي واپاري ارباب کي وياج جا پيسا نه ڏيڻ تي ڪِرائي جا قاتل گهرائي حملو ڪرايو آھي حملي ۾ منهنجو ڀاء صدام حسين لهر ۽ ڌي ساجده قتل ٿي ويا آھن.
الزام هيٺ آيل ڌُر واپاري ارباب ميرالي جو موقف به سامهون اچي ويو آهي جنهن جو چوڻ هو ته اسان جي لهر برادري سان ڀائري آھي اسين لهر برادري جي ٻن ڄڻن جي قتل ۾ ملوث ناهيون، سردار طارق جاويد لهر ڪٿي به اسان کي گھرائي ڳالهيون ڪري اسين پيش ٿينداسين اگر اسان مٿان ٻن ڄڻن جو خون ثابت ٿيو ته اسين 100 خون ڀري ڏينداسين.
