راولپنڊي: پاڪ فوج جي شعبي تعلقات عامه (آءِ ايس پي آر) موجب، افغان طالبان حڪومت پاران بلوچستان جي سرحد وٽ ڊرون اڏامن کانپوءِ پاڪستاني سيڪيورٽي فورسز مؤثر جوابي ڪارروائي ڪندي افغانستان کان ايندڙ 4 ڊرون تباهه ڪري ڇڏيا.
آءِ ايس پي آر جي جاري ڪيل بيان موجب، 30 جون تي افغان طالبان حڪومت بلوچستان جي سرحد ڏانهن چار ڊرون موڪليا، جيڪي مبينا طور طالبان جي ڪنٽرول هيٺ علائقن مان سرگرم دهشتگرد تنظيمن جي سرپرستي ۾ پاڪستان ڏانهن اماڻيا ويا هئا.
بيان ۾ چيو ويو آهي ته پاڪستان جو فضائي دفاعي نظام مڪمل طور تي متحرڪ هو، جنهن فوري طور ڊرونز جي سڃاڻپ ڪري مؤثر ڪارروائي ڪندي انهن کي ڪاميابي سان تباهه ڪري ڇڏيو.
آءِ ايس پي آر موجب، سيڪيورٽي فورسز جديد دفاعي نظام جي مدد سان چارئي ڊرون ناڪاره بڻائي ڇڏيا ۽ اعليٰ پيشاورانه صلاحيت جو مظاهرو ڪندي دشمن جا سمورا ناپاڪ ارادا ناڪام بڻايا.
بيان ۾ وڌيڪ چيو ويو آهي ته افغان طالبان حڪومت جا اهي قدم افغان عوام کي گمراهه ڪرڻ جي ڪوشش آهن، جڏهن ته طالبان حڪومت کي دهشتگرد تنظيمن جي سرپرستي ڇڏڻ گهرجي.
آءِ ايس پي آر خبردار ڪيو ته جيڪڏهن افغان طالبان پاڪستان خلاف اشتعال انگيزي جو سلسلو جاري رکيو ته کين اهڙو مؤثر جواب ڏنو ويندو، جنهن جي وڏي قيمت ادا ڪرڻي پوندي.
بيان موجب پاڪستان جون هٿياربند فوجون هر وقت مڪمل طور تي چوڪس آهن ۽ ملڪ جي هڪ هڪ انچ جي دفاع جي مڪمل صلاحيت رکن ٿيون. سرحد پار ڪنهن به قسم جي جارحيت جو “آپريشن غضبُ الحق” تحت فوري، فيصلائتو ۽ ڀرپور جواب ڏنو ويندو.
