اسلام آباد: (خميس: 29 جنوري 2026ع) پاڪستان ۾ نيپا وائرس جي امڪاني پکيڙ جي خدشي کي نظر ۾ رکندي قدم کنيا ويا آهن.
ڀارت ۾ وائرس جي پکيڙ کي نظر ۾ رکندي پاڪستان جي حڪومت الرٽ جاري ڪري ڇڏيو آهي. حڪومت پاڪستان جي سمورن پوائنٽس آف انٽري تي هاءِ الرٽ لاڳو ڪري ڇڏيو آهي.
بارڊر هيلٿ سروسز پاڪستان موجب اهو قدم عالمي صحت واري اداري جي رپورٽ کان پوءِ کنيو ويو آهي، انٽرنيشنل ايئرپورٽس، بندر گاهن، زميني سرحدن تي 100 سيڪڙو اسڪريننگ لازمي قرار ڏني وئي آهي.
سمورن مسافرن، عملي، ڊرائيور جي مڪمل اسڪريننگ ڪئي ويندي. بنا بارڊر هيلٿ سروسز هيلٿ ڪليئرنس ڪنهن به ماڻهو کي پاڪستان ۾ داخل ٿيڻ جي اجازت نه هوندي. سمورن پوائنٽس آف انٽري تي ٿرمل اسڪريننگ ۽ طبي معائنو لازمي قرار ڏنو ويو آهي. ڪنهن به مسافر کي بخار جي حالت ۽ ٻين نشانين تي فوري ڪارروائي جي هدايت جاري ڪئي وئي آهي.
نيپا وائرس جي نشانين ۾ بخار، مٿي ۾ سور، ساهه جي تڪليف ۽ اعصابي نشانيون شامل آهن. شڪي مريض کي فوري طور تي آئسوليٽ ڪري لاڳاپيل ادارن کي رپورٽ ڪرڻ جي هدايت ڪئي وئي آهي. انهي کان علاوه سفري ڄاڻ لڪائڻ يا غلط بياني ڪندڙن جي خلاف قانوني ڪارروائي جي به سفارش ڪئي وئي آهي.
هوڏانهن صحت کاتي نيپا وائرس جي پکيڙ بابت ايڊوائزري جاري ڪري ڇڏي آهي. جاري ڪيل ايڊوائزري موجب اهو وائرس جانورن کان انسانن ۽ انسانن کان انسانن ۾ منتقل ٿيندڙ وائرس آهي پر پاڪستان ۾ نيپا وائرس جو ڪوبه ڪيس رپورٽ نه ٿيو آهي.
سنڌ جي صحت کاتي موجب صورتحال تي نظر رکي پئي وڃي. سمورين سرڪاري، نجي اسپتالون الرٽ آهن. وفاقي صحت واري وزارت جي گائيڊ لائن تي عمل ڪيو پيو وڃي.
