آمريڪي نائب صدر جي پاڪستان آمد دوران سيڪيورٽي کي يقيني بڻائڻ لاءِ هڪ خاص “ڪور فلائٽ” پڻ هلائي وئي، جيڪا سندس سرڪاري جهاز سان گڏ آمريڪا کان پاڪستان تائين سفر ڪندي رهي. هي قدم اعليٰ سطحي سيڪيورٽي انتظامن جو حصو هو، جيڪو عام طور تي اهم عالمي اڳواڻن جي دوري دوران اختيار ڪيو ويندو آهي.
فلائٽ ٽريڪنگ ويب سائيٽ موجب “SAM091” ڪال سائن واري هن جهاز کي دنيا ڀر ۾ 9500 کان وڌيڪ ماڻهن ٽريڪ ڪيو، جيڪو ان ڳالهه جو ثبوت آهي ته هن اڏام ۾ عالمي سطح تي وڏي دلچسپي موجود هئي. هي جهاز آمريڪا جي رياست ميري لينڊ مان صبح 8:41 تي روانو ٿيو ۽ پيرس ۾ نائب صدر جي جهاز کان تقريباً 10 منٽ اڳ رات 9:23 تي لينڊ ڪيو.
بعد ۾، پيرس جي مقامي وقت موجب رات 11:58 تي، يعني نائب صدر جي خاص جهاز کان صرف 2 منٽ اڳ، ڪور فلائٽ اسلام آباد لاءِ رواني ٿي. جيتوڻيڪ ان جي رفتار ڪجهه گهٽ هئي، تنهن ڪري اهو جهاز نائب صدر جي جهاز کان ٿورو پٺتي رهيو، پر ٻنهي جهازن هڪ ئي وقت پاڪستان جي فضائي حدن ۾ داخلا ورتي.
جڏهن آمريڪي نائب صدر جو جهاز اسلام آباد ۾ لينڊ ٿيو، تڏهن ڪور فلائٽ پنهنجي الڳ روٽ تي اڳتي وڌندي اسڪردو کان ٿيندي لداخ جي ويجهو ڀارتي فضائي حدن ۾ داخل ٿي وئي. بعد ۾ اهو جهاز لهه کان گذرندي چين جي فضائي حدن ۾ داخل ٿيو، جتي پهچڻ کانپوءِ ان پنهنجو ٽرانسپونڊر بند ڪري ڇڏيو.
اييويئيشن ذريعن موجب اهڙي قسم جون ڪور فلائٽون عام طور تي اعليٰ سطحي فوجي يا حڪومتي مشنز دوران استعمال ڪيون وينديون آهن. انهن جو مقصد سيڪيورٽي کي وڌائڻ، ممڪن خطرن کي گهٽائڻ ۽ اهم شخصيتن جي محفوظ سفر کي يقيني بڻائڻ هوندو آهي.
