جيڪب آباد جي جمس اسپتال ۾ جديد ليزر سرجري مشين جو افتتاح، مريضن کي علاج جون جديد سهولتون فراهم ٿينديون

جيڪب آباد (رپورٽ عامر جان)جيڪب آباد انسٽيٽيوٽ آف ميڊيڪل سائنسز (جمس) اسپتال ۾ جديد اينو ريڪٽل فائبر ليزر سرجري مشين جي افتتاحي تقريب منعقد ڪئي وئي، جنهن ۾ جيڪب آباد جي صوبائي اسيمبلي جي ميمبر حاجي شير محمد خان مغيري مهمانِ خاص طور شرڪت ڪئي، جڏهن ته مير رافع حسين خان جکراڻي، ميمبر قومي اسيمبلي جي فوڪل پرسن، اعزازي مهمان طور شرڪت ڪئي. تقريب ۾ جمس جي ڊائريڪٽر ڊاڪٽر زبير احمد شيخ سميت ڊاڪٽرن، سياسي ۽ سماجي شخصيتن ۽ ٻين معززين وڏي انگ ۾ شرڪت ڪئي. ان موقعي تي جديد اينو ريڪٽل فائبر ليزر سرجري مشين جي تنصيب کي مريضن کي جديد طبي سهولتون فراهم ڪرڻ ۽ علاج جي معيار کي بهتر بڻائڻ ڏانهن هڪ اهم اڳڀرائي قرار ڏنو ويو. هن مشين ذريعي لاڳاپيل بيمارين جي علاج ۾ جديد ليزر ٽيڪنالاجيءَ مان فائدو حاصل ڪري سگهبو، جنهن سان مريضن کي جمس اسپتال ۾ علاج جي جديد طريقيڪار جون سهولتون ملڻ جي اميد آهي. جمس اسپتال ۾ جديد طبي اوزارن ۽ سهولتن جي فراهمي کي علائقي جي عوام لاءِ بهتر علاج جون سهولتون يقيني بڻائڻ ڏانهن هڪ اهم قدم قرار ڏنو پيو وڃي.