چين ۾ هڪ شخص الٽرا ميراٿن ۾ شاندار ڪارڪردگي ڏيکاريندي لڳاتار 100 ڏينهن تائين هر ڏينهن 100 ڪلوميٽر ڊوڙي عالمي رڪارڊ قائم ڪري ورتو آهي، جنهن سان هو سڄي دنيا جي توجہ جو مرڪز بڻجي ويو آهي.
غير ملڪي ميڊيا موجب، هوانگ زينگ لونگ، جيڪو “لانگ شاؤ” جي نالي سان به مشهور آهي، چين جي شهر فوشان ۾ 6 ڊسمبر 2025 کان 15 مارچ 2026 تائين هي غير معمولي چيلنج مڪمل ڪيو. ان دوران هن مجموعي طور 10 هزار ڪلوميٽر جو فاصلو طئي ڪيو.
رپورٽن موجب، هوانگ زينگ لونگ هن رڪارڊ لاءِ ڪورونا وبا دوران ئي تياري شروع ڪئي هئي. هن پنهنجي ڪاروبار کي به بند ڪري مڪمل ڌيان ڊوڙڻ ۽ فٽنيس تي ڏنو. ان کان اڳ هن سڄي چين ۾ هڪ سال تائين روزانو ڊوڙ جي مشق ڪئي، جنهن بعد هن هي تاريخي چيلنج مڪمل ڪيو.
هوانگ زينگ لونگ جو چوڻ هو ته گنيز ورلڊ رڪارڊ طرفان اهڙو اعزاز ملڻ سندس لاءِ وڏي خوشي جو باعث آهي. هن چيو ته ڪيترن ماڻهن هن چيلنج کي ناممڪن ۽ انساني حدن کان ٻاهر قرار ڏنو هو، پر هن ثابت ڪيو ته محنت سان هر هدف حاصل ڪري سگهجي ٿو.
رپورٽن مطابق، هن سخت جسماني چيلنج دوران سندس صحت کي برقرار رکڻ لاءِ هڪ ماهر غذائيت دان ۽ طبي ٽيم به گڏ هئي، جيڪا مسلسل سندس جسماني حالت جي نگراني ڪندي رهي.
هي ڪاميابي نه صرف راندين جي دنيا ۾ هڪ نئون رڪارڊ آهي پر انساني برداشت، عزم ۽ مسلسل محنت جو به هڪ وڏو مثال سمجهي پئي وڃي۔
