آرٽمس 2 مشن جا چارئي خلاباز ڏکڻ ڪيليفورنيا جي ساحل ويجهو پئسفڪ سمنڊ ۾ ڪاميابي سان لينڊ ڪري واپس زمين تي پهچي ويا آهن. هي مشن ناسا جي خلائي تاريخ ۾ هڪ اهم سنگ ميل قرار ڏنو پيو وڃي.
رپورٽن موجب، خلابازن پنهنجي 10 ڏينهن جي مشن دوران تقريباً 6 لک 85 هزار ميل جو سفر ڪيو ۽ چنڊ جي مدار ۾ چڪر لڳائي واپس زمين ڏانهن موٽيا. هي مشن انسانن کي ٻيهر چنڊ جي ويجهو وٺي وڃڻ جي حوالي سان گذريل 50 سالن کان پوءِ سڀ کان وڏو قدم آهي.
ناسا موجب، ڊسمبر 1972 کان پوءِ پهريون ڀيرو خلاباز زمين جي هيٺين مدار کان ٻاهر نڪري چنڊ جي مدار تائين پهتا. هي پيش رفت مستقبل جي چنڊ تي انساني مشنز لاءِ اهم بنياد فراهم ڪندي.
مشن ڪمانڊر ريڊ وائزمن واپسي کان پوءِ چيو ته سڀ خلاباز بلڪل ٺيڪ آهن ۽ هي سفر انهن لاءِ انتهائي يادگار رهيو. هن مشن کي انساني خلائي تحقيق ۾ هڪ نئين دور جي شروعات قرار ڏنو پيو وڃي، جيڪو مستقبل ۾ وڌيڪ ڊگهن ۽ پيچيده مشنز جي راهه هموار ڪندو۔
