بيلاروس جي صدر اليگزينڊر لوڪاشينڪو چيو آهي ته جيڪڏهن آمريڪا ايران سان مؤثر نموني مقابلو نٿو ڪري سگهي ته پوءِ ان کي چين جهڙي وڏي طاقت سان به ٽڪراءُ کان پاسو ڪرڻ گهرجي.
روسي ميڊيا کي ڏنل انٽرويو ۾ لوڪاشينڪو چيو ته اڳوڻي آمريڪي صدر ڊونلڊ ٽرمپ به اهو ثابت ڪيو آهي ته آمريڪا کي جنهن حد تائين طاقتور سمجهيو ويندو آهي، حقيقت ۾ اهو ايترو طاقتور ناهي. هن موجب جيڪڏهن آمريڪا ايران جهڙي ملڪ سان معاملو صحيح نموني نه سنڀالي سگهيو آهي ته چين سان مقابلو ان لاءِ وڌيڪ ڏکيو ثابت ٿيندو.
بيلاروسي صدر وڌيڪ چيو ته آمريڪا جا بنيادي مفاد تيل ۽ گئس جهڙن قدرتي وسيلن تي ڪنٽرول حاصل ڪرڻ آهن، ۽ ان مقصد لاءِ هو دنيا جي مختلف علائقن ۾ مداخلت ڪندو رهي ٿو.
هن آمريڪا تي تنقيد ڪندي چيو ته واشنگٽن پاڻ کي جمهوريت ۽ انساني حقن جو علمبردار سڏائي ٿو، پر حقيقت ۾ صورتحال ان جي ابتڙ آهي. سندس چوڻ موجب وينيزوئلا، ڪيوبا ۽ وچ اوڀر ۾ آمريڪي پاليسيون اصل ۾ آمريت جي مثال آهن.
لوڪاشينڪو مغربي ملڪن جي انساني حقن بابت دعوائن تي به سوال اٿاريا ۽ چيو ته ڪيترن ئي واقعن ۾ آمريڪا هزارين ڪلوميٽر پري وڃي هڪ خودمختيار ملڪ تي حملا ڪيا، جن ۾ بيگناهه ماڻهو مارجي ويا.
هن چيو ته اهڙا عمل مغرب جي دوکي ۽ ٻيڻي معيار کي ظاهر ڪن ٿا، جتي هڪ پاسي انساني حقن جون ڳالهيون ٿين ٿيون ۽ ٻئي پاسي جنگن ۽ حملن جي حمايت ڪئي وڃي ٿي.
