دادو جي محمد شاهه غريب آباد ڪالوني جي رهواسڻ مسمات نجمه ڏاهري پي سي يو پريس ڪلب پهچي اهم پريس ڪانفرنس ڪئي، جنهن ۾ هن پنهنجي ڌي جي اغوا ۽ پاڻ کي ملندڙ ڌمڪين بابت ڳڻتي ظاهر ڪئي.
نجمه ڏاهري ميڊيا سان ڳالهائيندي الزام لڳايو ته شاھ محمد ڏاهري سندس ڌي شازيه ڏاهري کي ورغلائي گهران ڀڄائي ويو هو. هن ٻڌايو ته واقعي بعد هن علائقي جي معززين کي دانهن ڏني، جنهن کانپوءِ معاملو وڏيري بخشل پنھور وٽ فيصلو لاءِ پيش ڪيو ويو. هن دعويٰ ڪئي ته فيصلي دوران سندس حق ۾ فيصلو ٿيو ۽ سندس ڌي واپس ڪرائي وئي، جڏهن ته جوابدار تي 8 لک 50 هزار رپيا ڏنڊ مقرر ڪيو ويو.
هن وڌيڪ چيو ته ڄاڻايل ڏنڊ جي رقم پپو ماڇي، نياز ماڇي ۽ حافظ سڪندر ماڇي وصول ڪري پاڻ وٽ رکي ڇڏي ۽ متاثر ڌر کي نه ڏني. نجمه ڏاهري الزام هنيو ته ساڳين ماڻهن جي مبينا ورغلائڻ تي شاھ محمد ڏاهري ٻيهر سندس ڌي کي ڀڄائي ويو آهي.
پريس ڪانفرنس دوران نجمه ڏاهري سيشن جج دادو، ايس ايس پي دادو ۽ ٻين اعليٰ اختيارين کي اپيل ڪئي ته کيس انصاف فراهم ڪيو وڃي، سندس ڌي کي ڳولي بازياب ڪرايو وڃي، ۽ کيس ملندڙ ڌمڪين کان تحفظ ڏنو وڃي. هن مطالبو ڪيو ته الزام هيٺ آيل ماڻهن خلاف قانون موجب ڪارروائي ڪئي وڃي.
