اسلام آباد: آزادي صحافت جي عالمي ڏينهن جي موقعي تي صدر مملڪت آصف علي زرداري ۽ وزيراعظم شهباز شريف پنهنجا پيغام جاري ڪيا آهن، جن ۾ هنن آزاد صحافت کي سماج ۾ احتساب، شفافيت ۽ سچائي لاءِ انتهائي ضروري قرار ڏنو آهي.
وزيراعظم شهباز شريف پنهنجي پيغام ۾ چيو ته پروپيگنڊا، جعلي خبرون ۽ غير تصديق ٿيل معلومات جي ترسيل کي روڪڻ هر صحافي جي ذميواري آهي. هن چيو ته موجوده دور ۾ امن ۽ امان صرف سفارتي ڪوششن سان ممڪن نه آهي، بلڪه مستند معلومات ۽ ذميوار صحافت امن قائم ڪرڻ ۾ اهم ڪردار ادا ڪري ٿي.
هن وڌيڪ چيو ته پاڪستان هميشه اختلاف راءِ کي ڳالهه ٻولهه ۽ مذاڪرات ذريعي حل ڪرڻ کي ترجيح ڏني آهي. پاڪستان خطي ۾ امن ۽ استحڪام لاءِ مثبت ڪردار ادا ڪري رهيو آهي. وزيراعظم چيو ته قومي ميڊيا مختلف آپريشنز دوران به اهم ذميواريون نڀايون ۽ قومي يڪجهتي کي مضبوط ڪيو.
شهباز شريف چيو ته جديد دور ۾ ڊجيٽل ميڊيا راءِ عامه ٺاهڻ ۾ اهم ڪردار ادا ڪري رهيو آهي، پر ساڳئي وقت جعلي خبرون ۽ منظم گمراهه ڪندڙ مهمون قومي هم آهنگي لاءِ خطرو بڻجي رهيون آهن. هن صحافين کي اپيل ڪئي ته هو تصديق، ايمانداري ۽ پيشورانه معيار کي هميشه ترجيح ڏين.
هن اهو به چيو ته حڪومت صحافتي آزادي جي تحفظ ۽ فروغ لاءِ هر ممڪن قدم کڻندي ۽ صحافين لاءِ سازگار ماحول پيدا ڪرڻ جاري رکندي.
ٻئي پاسي صدر آصف علي زرداري پنهنجي پيغام ۾ چيو ته سچائي کان سواءِ امن ممڪن نه آهي ۽ صحافت جو ڪردار معاشري ۾ بنيادي اهميت رکي ٿو. هن چيو ته ڊس انفارميشن ۽ غلط معلومات جهموري ڳالهه ٻولهه کي متاثر ڪري رهي آهي.
صدر چيو ته دنيا ڀر ۾ صحافين کي هراسان ڪرڻ ۽ دٻاءُ جو منهن ڏسڻو پوي ٿو، جيڪا انتهائي ڳڻتي جوڳي ڳالهه آهي. هن چيو ته سوشل ميڊيا جو غير ذميوارانه استعمال پڻ هڪ وڏو مسئلو بڻجي ويو آهي.
آصف علي زرداري چيو ته پاڪستان جي آئين جو آرٽيڪل 19 صحافت جي آزادي جي ضمانت ڏئي ٿو. آزاد ميڊيا ڪنهن به قوم جي طاقت ۽ مضبوطي جي علامت آهي. هن زور ڏنو ته احتساب ۽ شفافيت لاءِ آزاد صحافت ناگزير آهي.
هن وڌيڪ چيو ته رفتار کان وڌيڪ درستگي کي ترجيح ڏيڻ گهرجي، ڇو ته غلط معلومات معاشري ۾ انتشار پيدا ڪري ٿي. صدر چيو ته پاڪستان خلاف منظم جھوٽيون مهمون هلن پيون، پر قومي يڪجهتي سان انهن کي ناڪام بڻايو ويو آهي.
صدر مملڪت شهيد صحافين کي خراج عقيدت پيش ڪيو ۽ چيو ته صحافين لاءِ محفوظ ماحول يقيني بڻائڻ انتهائي ضروري آهي. هن چيو ته عوام کي به گهرجي ته هو غلط خبرن کي رد ڪري ۽ سچ جو ساٿ ڏئي.
آخر ۾ هن چيو ته هڪ مضبوط ۽ معتبر معلوماتي نظام ملڪ ۾ امن، استحڪام ۽ ترقي لاءِ بنيادي اهميت رکي ٿو۔
