ڪوئيٽا: بلوچستان کان ملڪ جي مختلف شهرن ڏانهن ويندڙ ٽرين سروس ٻيهر بحال ڪئي وئي آهي، جيڪا ٻن ڏينهن تائين معطل رهي هئي.
ريلوي کاتي موجب ناگزير سببن جي ڪري 18 ۽ 19 مئي تي بلوچستان کان اندرون ملڪ هلندڙ ٽرين سروس عارضي طور بند ڪئي وئي هئي، جنهن سبب مسافرن کي ڏکيائين کي منهن ڏيڻو پيو.
ريلوي اختيارين ٻڌايو ته ڪوئيٽا کان پشاور ويندڙ جعفر ايڪسپريس ٻن ڏينهن لاءِ مڪمل طور منسوخ ڪئي وئي هئي، جڏهن ته پشاور کان ڪوئيٽا ايندڙ جعفر ايڪسپريس کي ٻن ڏينهن تائين صرف جيڪب آباد تائين محدود رکيو ويو هو.
هاڻي ٽرين سروس بحال ٿيڻ بعد جعفر ايڪسپريس پنهنجي مقرر وقت مطابق صبح 9 وڳي ڪوئيٽا کان پشاور لاءِ رواني ٿيندي. ساڳئي ريت پشاور کان ايندڙ جعفر ايڪسپريس به اربع جي منجهند تائين ڪوئيٽا پهچي ويندي.
ريلوي اختيارين موجب ٽرين سروس جي بحالي سان مسافرن کي وڏي رليف ملندو، خاص طور تي اهي ماڻهو جيڪي ڊگهي سفر لاءِ ريلوي کي سستو ۽ محفوظ ذريعو سمجهن ٿا.
بلوچستان کي ملڪ جي ٻين حصن سان ڳنڍڻ ۾ جعفر ايڪسپريس اهم ڪردار ادا ڪري ٿي ۽ هر مهيني هزارين مسافر هن ٽرين ذريعي سفر ڪن ٿا.
ريلوي عملدارن وڌيڪ چيو ته مسافرن جي حفاظت ۽ ٽرين آپريشن کي بهتر بڻائڻ لاءِ ضروري انتظام ڪيا ويا آهن، جڏهن ته صورتحال تي ويجهي نظر پڻ رکي پئي وڃي.
مسافرن ٽرين سروس جي بحالي تي خوشي جو اظهار ڪندي چيو آهي ته ريلوي سفر نه رڳو سستو پر آرامده پڻ آهي، تنهنڪري سروس جي بحالي سندن لاءِ سٺي خبر آهي.
