ڊي آءِ جي حيدرآباد جو ريجنل پوليس اسپتال جو دورو، ٿائي رائيڊ ٽيسٽنگ مشين جو افتتاح

حيدرآباد ( رپورٽ ذوالفقار) ڊي آءِ جي پوليس حيدرآباد رينج طارق رزاق خان ڌاريجو ريجنل پوليس اسپتال حيدرآباد جو دورو ڪري ٿائي رائيڊ جي بيمارين جي سڃاڻپ لاءِ نئين ٽيسٽنگ مشين جو افتتاح ڪيو. ان موقعي تي اسپتال جي ميڊيڪل سپرنٽينڊنٽ ڊاڪٽر نذير فيروز ميمڻ کيس مشين جي ڪارڪردگي، افاديت ۽ ٽيسٽ جي طريقيڪار بابت تفصيلي بريفنگ ڏني. نئين مشين جي سهولت سان پوليس ملازمن ۾ ٿائي رائيڊ جي بيمارين جي بروقت سڃاڻپ ۽ بهتر علاج ۾ مدد ملندي.دوري دوران ڊي آءِ جي پوليس اسپتال جي مختلف شعبن، جن ۾ فارمييسي، ايڪسري، فزيوٿراپي، ڊائلاسز سينٽر، اکين جي شعبي ۽ آپريشن ٿيٽر شامل آهن، جو معائنو ڪيو. هن اسپتال ۾ علاج هيٺ مريضن سان ملاقات ڪري سندن خيريت معلوم ڪئي ۽ کين فراهم ٿيندڙ طبي سهولتن بابت ڄاڻ حاصل ڪئي، جڏهن ته پاڻ به طبي ٽيسٽ ڪرايا.ان موقعي تي ڊي آءِ جي طارق رزاق خان ڌاريجو چيو ته پوليس آفيسرن ۽ اهلڪارن جي صحت ۽ ڀلائي سان گڏ شهيدن جي وارثن جي سار سنڀال پوليس کاتي جي اهم ذميوارين ۾ شامل آهي. هن چيو ته پوليس ملازمن ۽ سندن خاندانن کي بهتر علاج جون سهولتون فراهم ڪرڻ لاءِ ڪوششون جاري رکيون وينديون.
ريجنل پوليس اسپتال حيدرآباد ۾ پوليس آفيسرن، اهلڪارن ۽ شهيدن جي خاندانن کي ڊائلاسز، اکين جي علاج، آپريشن ۽ ٻين طبي سهولتن کانسواءِ بيمارين جي بروقت ۽ درست تشخيص لاءِ جديد پئٿالاجي ليبارٽري جي سهولت پڻ فراهم ڪئي پئي وڃي، جڏهن ته مختلف بيمارين جي سڃاڻپ ۽ علاج لاءِ طبي ڪئمپون پڻ لڳايون وڃن ٿيون.ڊي آءِ جي پوليس ڊاڪٽرن ۽ طبي عملي جي محنت، پيشه ورانه صلاحيتن ۽ خدمت جي جذبي کي ساراهيندي سندن خدمتن کي قابلِ تحسين قرار ڏنو.