دادو: سڄي ملڪ وانگر دادو شهر ۽ ڀرپاسي جي علائقن ۾ پڻ 10 محرم الحرام يومِ عاشورا نهايت عقيدت، احترام ۽ مذهبي جوش و جذبي سان ملهايو ويو. حضرت امام حسين عليه السلام ۽ سندن جانثار ساٿين جي عظيم قربانين کي ڀيٽا پيش ڪرڻ لاءِ شهر ۾ مختلف مجلسن، ماتمي جلوسن ۽ عزاداري جي تقريبن جو اهتمام ڪيو ويو.
مرڪزي امام بارگاهه دادو مان هزارين عزادارن جو قديمي مرڪزي ماتمي جلوس برآمد ٿيو، جنهن ۾ دادو شهر سميت جوهي، ميهڙ، خيرپور ناٿن شاهه ۽ ٻين ويجهن علائقن مان به وڏي انگ ۾ عزادارن شرڪت ڪئي. جلوس پنهنجي مقرر روايتي رستن تان گذرندو مين چوڪ ڪچھري روڊ تي پهتو، جتي عزادارن حضرت امام حسين عليه السلام ۽ شهيدن ڪربلا جي لازوال قربانين کي خراجِ عقيدت پيش ڪيو.
ان موقعي تي شيعا عالمن ۽ ذاڪرن پنهنجي خطابن ۾ واقعي ڪربلا جي فلسفي، حق، صبر، قرباني ۽ ظلم خلاف جدوجهد تي روشني وڌي. خطابن کانپوءِ عزادارن زنجيري ماتم ڪيو، جنهن دوران سوين عزادار زخمي ٿي پيا. زخمين کي جلوس جي رستن ۽ ماتمي ميدان ۾ قائم مختلف ميڊيڪل ڪئمپن تي فوري طبي امداد (فرسٽ ايڊ) فراهم ڪئي وئي، جڏهن ته وڌيڪ علاج لاءِ ايمبولينسن ذريعي مقامي سول اسپتال دادو منتقل ڪيو ويو.
ماتمي ميدان ۽ جلوس جي مختلف رستن تي سياسي، سماجي ۽ فلاحي تنظيمن پاران عزادارن جي خدمت لاءِ سبيلون، طبي ڪئمپون ۽ امدادي مرڪز قائم ڪيا ويا. پاڪستان پيپلز پارٽي (شهيد ڀٽو)، جي ڊي اي، دادو رابطا ڪاميٽي، پي سي يو پريس ڪلب دادو ۽ ٻين ڪيترين ئي تنظيمن ضلعي صحت کاتي (ڊي ايڇ او) ۽ لاڳاپيل ادارن جي سهڪار سان عزادارن کي طبي سهولتون، ٿڌو پاڻي، شربت ۽ ٻين ضروري سهولتن جي فراهمي کي يقيني بڻايو.
يومِ عاشورا جي موقعي تي ضلعي انتظاميه، دادو پوليس، رينجرز ۽ ٻين قانون لاڳو ڪندڙ ادارن پاران سخت سيڪيورٽي جا انتظام ڪيا ويا هئا. جلوس جي رستن تي سيڪيورٽي جا غيرمعمولي انتظام، نگراني، ٽريفڪ جي رواني ۽ ايمرجنسي سروسز کي يقيني بڻايو ويو، جنهن سبب سمورا مذهبي پروگرام مجموعي طور پرامن ماحول ۾ پنهنجي پڄاڻي تي پهتا.
