سانگهڙ يومِ عاشورا تي سانگهڙ ۾ مرڪزي ماتمي جلوس برآمد، سخت سيڪيورٽي انتظام

حضرت امام حسينؑ ۽ شهيدنِ ڪربلا جي عظيم قربانين کي ڀيٽا پيش ڪرڻ لاءِ يومِ عاشورا (10 محرم الحرام) جي موقعي تي سانگهڙ ۾ مرڪزي ماتمي جلوس امام بارگاهه حيدري مان برآمد ٿيو.جلوس پنهنجي روايتي رستن تان نوحه خواني ۽ سينه زني ڪندو امام بارگاهه حسيني پهتو، جتي عزادارن نمازِ جمعه ۽ نمازِ ظهر ادا ڪئي. نماز کان پوءِ جلوس ٻيهر پنهجي روايتي رستن ايم اي جناح روڊ تي پهتو جتي مومنين پاران گرز ۽ زنجيرن جو ماتم ڪيو ويو جنهن بعد روايتي رستن تان ٿيندو حيدري امام بارگاهه ۾ نھر ٿيو
ٻئي طرف يومِ عاشورا جي موقعي تي ضلعي انتظاميا طرفان سيڪيورٽي جا انتهائي سخت انتظام ڪيا ويا. جلوس جي سمورن رستن تي پوليس، رينجرز ۽ ٻين قانون لاڳو ڪندڙ ادارن جي وڏي نفري مقرر ڪئي وئي، جڏهن ته ضلعي انتظاميا به سڄي صورتحال جي مسلسل نگراني ڪندي رهي، جيئن عزادار حضرت امام حسينؑ جي ياد ۾ پنهنجا مذهبي فرض مڪمل امن ۽ سڪون واري ماحول ۾ ادا ڪري سگهن.