پاڪستان کي سعودي عرب کان وڌيڪ هڪ ارب ڊالر ملي ويا، اسٽيٽ بينڪ تصديق ڪري ڇڏي

پاڪستان کي سعودي عرب طرفان وڌيڪ هڪ ارب ڊالر ملي ويا آهن. اسٽيٽ بينڪ آف پاڪستان تصديق ڪئي آهي ته سعودي عرب طرفان 3 ارب ڊالر جي ڊپازٽ جي ٻئي قسط هڪ ارب ڊالر پاڪستان ملي ويا آهن. انهي کان اڳ 2 ارب ڊالرن جي پهرين قسط 15 اپريل تي ملي وئي هئي. ياد رهي ته 15 اپريل تي اسٽيٽ بينڪ بيان ۾ ٻڌايو هو ته سعودي ناڻي واري وزارت طرفان 2 ارب ڊالر وصول ٿيڻ سان گڏ ئي پاڪستان جي ناڻي جي ذخيرن کي مستحڪم ڪرڻ جي لاءِ گڏيل طور تي 3 ارب ڊالر جي فنانسنگ جي يقين دهاني به ڪرائي آهي. جنهن کان پوءِ سعودي عرب پاڪستان ۾ رکيل 3 ارب ڊالر جا ڊپازٽ به رول اوور ڪري ڇڏيا هئا جنهن جي لاءِ اسٽيٽ بينڪ ۽ سعودي فنڊ براءِ ترقي جي وچ ۾ باقاعده معاهدو طئي ٿي ويو هو، جنهن تي آمريڪا ۾ صحيحون پڻ ڪيون ويون هيون. ناڻي واري وزارت موجب وفاقي ناڻي واري وزير محمد اورنگزيب واشنگٽن ڊي سي ۾ هڪ اهم مالي معاهدي تي صحيحن جي تقريب ۾ شرڪت ڪئي جنهن ۾ آمريڪا ۾ مقرر پاڪستان جو سفير به موجود هو. اها تقريب عالمي بينڪ ۽ عالمي مالياتي اداري(آءِ ايم ايف) جي بهار اجلاس 2026 جي موقعي تي منعقد ٿي هئي. انهي سلسلي ۾ جاري ڪيل پڌرائي ۾ ٻڌايو ويو هو ته اهو معاهدو سعودي فنڊ براءِ ترقي(ايس ايف ڊي) ۽ اسٽيٽ بينڪ آف پاڪستان(ايس بي پي) جي وچ ۾ طئي ٿيو هو جنهن جي تحت اسٽيٽ بينڪ ۾ رکيل 3 ارب ڊالر جي سعودي ڊپازٽ جي مدي ۾ واڌ ڪئي وئي آهي.