يوم عاشورا: سنڌ جي گهرو وزير ضياءُ الحسن لنجار حيدرآباد ۾ مرڪزي جلوس جي سيڪيورٽي انتظامن جو جائزو ورتو، پرامن انتظامن تي اطمينان جو اظهار
حيدرآباد (محبوب حسين بوزدار): سنڌ جي گهرو، قانون ۽ پارلياماني معاملن واري وزير ضياءُ الحسن لنجار يوم عاشورا جي موقعي تي حيدرآباد ۾ نڪرندڙ مرڪزي جلوس جي سيڪيورٽي ۽ انتظامي معاملن جو تفصيلي جائزو ورتو. هن دوري دوران لاڳاپيل آفيسرن کيس سيڪيورٽي پلان، ٽريفڪ مينيجمينٽ، ايمرجنسي قدمن، ميونسپل سهولتن ۽ ٻين انتظامن بابت تفصيلي بريفنگ ڏني.
ان موقعي تي ميڊيا سان ڳالهائيندي گهرو وزير چيو ته سنڌ جي سمورن ضلعن ۾ يوم عاشورا جا جلوس ۽ مجلسون مڪمل پرامن ماحول ۾ جاري آهن ۽ سنڌ حڪومت طرفان عزادارن جي جان، مال ۽ عزت جي تحفظ لاءِ فول پروف سيڪيورٽي انتظام ڪيا ويا آهن. هن چيو ته حڪومت امن امان جي صورتحال برقرار رکڻ لاءِ هر ممڪن قدم کنيو آهي ۽ ڪنهن به قسم جي لاپرواهي يا غفلت برداشت نه ڪئي ويندي.
ضياءُ الحسن لنجار چيو ته محرم الحرام دوران حساس علائقن، امام بارگاهن، مجلسن ۽ جلوسن جي نگراني لاءِ پوليس، رينجرز، ضلعي انتظاميا، ريسڪيو ادارن ۽ ٻين قانون لاڳو ڪندڙ ادارن کي مڪمل طور تي الرٽ رکيو ويو آهي. هن چيو ته جديد ٽيڪنالاجي، سي سي ٽي وي ڪيمرائن، واڪ ٿرو گيٽن، ميٽل ڊيڪٽرن ۽ اضافي پوليس نفري ذريعي سيڪيورٽي کي وڌيڪ مضبوط بڻايو ويو آهي.
هن وڌيڪ چيو ته يوم عاشورا جي موقعي تي ڪنهن به هنگامي صورتحال کي منهن ڏيڻ لاءِ اڳواٽ ايمرجنسي پلان تيار ڪيو ويو هو، جڏهن ته سمورن لاڳاپيل ادارن وچ ۾ مسلسل رابطي جو موثر نظام قائم ڪيو ويو ته جيئن ڪنهن به غيرمعمولي صورتحال ۾ فوري ڪارروائي ممڪن بڻائي سگهجي.
ان موقعي تي ڪمشنر حيدرآباد ڊويزن فياض حسين عباسي، ڊي آءِ جي حيدرآباد طارق رزاق ڌاريجو، ڊپٽي ڪمشنر حيدرآباد زين العابدين ميمڻ، ايس ايس پي حيدرآباد شاهزيب چاچڙ ۽ ٻين لاڳاپيل آفيسرن پڻ گهرو وزير سان گڏ مرڪزي جلوس جي مختلف انتظامن جو جائزو ورتو.
آفيسرن گهرو وزير کي جلوس جي مقرر ڪيل رستي، سيڪيورٽي پوائنٽن، داخلي ۽ خارجي رستن، ٽريفڪ ڪنٽرول، ريسڪيو سهولتن، ايمبولينسن، طبي ڪئمپن ۽ ٻين حفاظتي انتظامن بابت تفصيلي بريفنگ ڏني.
ضلعي انتظاميا طرفان يوم عاشورا جي مرڪزي جلوس دوران صرف سيڪيورٽي تي ئي نه، پر ٽريفڪ جي رواني، صفائي سٿرائي، پاڻي جي نيڪال، ميونسپل سهولتن، پيئڻ جي صاف پاڻي، صحت جي سهولتن، ريسڪيو سروسز ۽ ٻين انتظامي معاملن تي پڻ مسلسل نگراني ڪئي وئي.
انتظاميا موجب جلوس جي مقرر ڪيل رستي تي صفائي سٿرائي جا خاص انتظام ڪيا ويا، جڏهن ته عزادارن جي سهولت لاءِ پاڻي جون سبيلون، طبي امدادي ڪئمپون ۽ ايمبولينسون پڻ مقرر ڪيون ويون. ريسڪيو ادارن کي ڪنهن به هنگامي صورتحال کي منهن ڏيڻ لاءِ الرٽ رکيو ويو هو.
ٽريفڪ پوليس پاران به اڳواٽ متبادل ٽريفڪ پلان تيار ڪيو ويو، جنهن تحت مختلف شاهراهن تي ٽريفڪ کي متبادل رستن ڏانهن منتقل ڪيو ويو ته جيئن شهري گهٽ کان گهٽ تڪليف سان پنهنجي منزل تائين پهچي سگهن. شهرين کي ٽريفڪ رستن بابت اڳواٽ آگاهي پڻ فراهم ڪئي وئي.
گهرو وزير ضياءُ الحسن لنجار مختلف سيڪيورٽي پوائنٽن جو پڻ دورو ڪيو، جتي هن ڊيوٽي تي مقرر پوليس اهلڪارن ۽ ٻين قانون لاڳو ڪندڙ ادارن جي ڪارڪردگي جو جائزو ورتو. هن اهلڪارن کي هدايت ڪئي ته هو پنهنجي ذميوارين کي مڪمل چوڪسي، ايمانداري ۽ پيشاوراڻي انداز ۾ نڀائين ته جيئن عزادارن کي ڪنهن به قسم جي تڪليف پيش نه اچي.
هن چيو ته سنڌ حڪومت مذهبي آزادي، امن امان ۽ عوام جي تحفظ لاءِ هر وقت سنجيده آهي ۽ محرم الحرام دوران ڪنهن به شرپسند عنصر کي امن خراب ڪرڻ جي اجازت نه ڏني ويندي.
ضلعي انتظاميا موجب سمورن لاڳاپيل ادارن جي گڏيل سهڪار، موثر رابطي ۽ بهتر حڪمت عملي جي نتيجي ۾ يوم عاشورا جو مرڪزي جلوس پنهنجي مقرر ڪيل رستي تان مڪمل پرامن نموني سان اختتام پذير ٿيو ۽ سڄي تقريب دوران امن امان جي صورتحال مڪمل طور تي ڪنٽرول ۾ رهي.
ڊپٽي ڪمشنر حيدرآباد زين العابدين ميمڻ ان موقعي تي سڀني لاڳاپيل ادارن، پوليس، رينجرز، ريسڪيو سروسز، ميونسپل عملي، صحت کاتي، ٽريفڪ پوليس، سول ڊفينس، رضاڪارن ۽ عزاداري انجمنن جي ڀرپور سهڪار کي ساراهيو.
هن چيو ته سڀني ادارن هڪ ٽيم جي حيثيت سان ڪم ڪيو، جنهن سبب يوم عاشورا جا انتظام ڪاميابي سان مڪمل ٿيا. هن وڌيڪ چيو ته محرم الحرام کان اڳ ئي مختلف اجلاس ڪوٺائي سمورن انتظامي معاملن جو تفصيلي جائزو ورتو ويو هو، جنهن جا مثبت نتيجا سامهون آيا.
ڊي آءِ جي حيدرآباد طارق رزاق ڌاريجو چيو ته پوليس اهلڪارن انتهائي ذميواري سان پنهنجون خدمتون سرانجام ڏنيون، جڏهن ته حساس هنڌن تي اضافي نفري مقرر ڪئي وئي هئي ۽ جلوس جي داخلي ۽ خارجي رستن تي سخت نگراني ڪئي وئي.
ڪمشنر حيدرآباد ڊويزن فياض حسين عباسي چيو ته سمورن ادارن جي بهتر هم آهنگي سبب عزادارن کي محفوظ ۽ پرامن ماحول فراهم ڪرڻ ۾ ڪاميابي ملي. هن شهرين جي سهڪار تي پڻ شڪريو ادا ڪندي چيو ته عوام انتظاميا سان مڪمل تعاون ڪيو، جنهن سان انتظامن کي وڌيڪ موثر بڻائڻ ۾ مدد ملي.
آخر ۾ سنڌ جي گهرو وزير ضياءُ الحسن لنجار چيو ته سنڌ حڪومت عوام جي جان ۽ مال جي تحفظ کي پنهنجي پهرين ترجيح سمجهي ٿي ۽ مستقبل ۾ به مذهبي، قومي ۽ عوامي موقعن تي اهڙي ئي ذميواري سان سيڪيورٽي ۽ انتظامي قدم کنيا ويندا. هن پوليس، ضلعي انتظاميا، قانون لاڳو ڪندڙ ادارن، ريسڪيو سروسز، ميونسپل عملي، رضاڪارن ۽ عزاداري انجمنن جي خدمتن کي ساراهيندي چيو ته سڀني جي گڏيل ڪوششن سبب يوم عاشورا جا جلوس ۽ مجلسون پرامن ماحول ۾ اختتام پذير ٿيون، جيڪو سنڌ جي روايتي مذهبي هم آهنگي، امن ۽ اتحاد جو بهترين مثال آهي.
