گورنمينٽ بوائز ايليمينٽري مين اسڪول راڻيپور جي عمارت جو هڪ حصو انتهائي حساس، زبون حال ۽ خطرناڪ بڻجي ويو آهي، جنهن سبب اسڪول ۾ تعليم حاصل ڪندڙ شاگردن، استادن ۽ عملي جي زندگيءَ کي سخت خطرا لاحق آهن. اسڪول ۾ شاگردن جو تعداد پڻ وڏي تعداد ۾ آهي، جنهن ڪري عمارت جي خراب حصي کي نظرانداز ڪرڻ ڪنهن به صورت ۾ مناسب نه آهي.
اسڪول جي عمارت جي متاثر ٿيل حصي جي حالت اهڙي آهي، جو جيڪڏهن بروقت مرمت، بحالي يا خطرناڪ حصي کي محفوظ بڻائڻ لاءِ قدم نه کنيا ويا ته خدا نه ڪري ڪنهن به وقت ڪو افسوسناڪ حادثو پيش اچي سگهي ٿو. والدين ۽ علائقي جي رهواسين پاران پڻ ڳڻتي جو اظهار ڪيو پيو وڃي ته معصوم ٻار روزانو اهڙي عمارت ۾ تعليم حاصل ڪري رهيا آهن، جيڪا سندن لاءِ خطري جو سبب بڻجي سگهي ٿي.
شهرين جو چوڻ آهي ته تعليم هر ٻار جو بنيادي حق آهي، پر ٻارن کي محفوظ ۽ بهتر ماحول فراهم ڪرڻ حڪومت ۽ لاڳاپيل تعليمي انتظاميا جي بنيادي ذميواري آهي. اسڪول ۾ شاگردن جو انگ وڌيڪ هجڻ ڪري ڪنهن به هنگامي صورتحال ۾ نقصان جو خدشو پڻ وڌي سگهي ٿو.
علائقي واسين حڪومت سنڌ جي تعليم کاتي، صوبائي وزير تعليم سنڌ، سيڪريٽري اسڪول ايجوڪيشن، ڊائريڪٽر اسڪول ايجوڪيشن، ضلعي تعليم کاتي ۽ لاڳاپيل انجنيئرنگ اختيارين کان مطالبو ڪيو آهي ته گورنمينٽ بوائز ايليمينٽري مين اسڪول راڻيپور جي عمارت جو فوري طور تي فني معائنو ڪرايو وڃي، خاص طور تي خطرناڪ حصي جي مڪمل جاچ ڪرائي ان جي مرمت يا ٻيهر تعمير لاءِ هنگامي بنيادن تي فنڊ جاري ڪيا وڃن.
والدين ۽ شهرين جو وڌيڪ چوڻ آهي ته ڪنهن حادثي جو انتظار ڪرڻ بدران اڳواٽ حفاظتي قدم کڻڻ ئي ذميوار انتظاميا جي نشاني آهي. جيڪڏهن عمارت جو ڪو حصو شاگردن لاءِ غير محفوظ قرار ڏنو وڃي ته ان کي فوري طور بند ڪري شاگردن لاءِ متبادل محفوظ جاءِ جو انتظام ڪيو وڃي، جيئن ٻارن جي تعليم پڻ متاثر نه ٿئي ۽ سندن زندگيون به محفوظ رهن.
شهرين سنڌ حڪومت ۽ تعليم کاتي جي اعليٰ اختيارين کي اپيل ڪئي آهي ته معاملي جو فوري نوٽيس وٺي لاڳاپيل آفيسرن کي اسڪول جو دورو ڪرائي رپورٽ طلب ڪئي وڃي ۽ خطرناڪ عمارت بابت هنگامي بنيادن تي عملي قدم کنيا وڃن.
عوامي حلقن جو چوڻ آهي ته الله پاڪ خير ڪري، ڪنهن به افسوسناڪ حادثي کان اڳ اسڪول جي عمارت کي محفوظ بڻايو وڃي، ڇو ته معصوم ٻارن جي زندگين کان وڌيڪ قيمتي ٻي ڪا شيءِ ناهي.
