ڪراچي: پاڪستان پيپلز پارٽي جي چيئرمين بلاول ڀٽو زرداري چيو آهي ته عالمي سطح تي سفارتي محاذ تي پاڪستان کي جيڪا تاريخي پذيرائي ملي آهي، اها دشمن قوتن کان هضم نٿي ٿئي. هن چيو ته پاڪستان جي عالمي سطح تي وڌندڙ وقار ۽ سفارتي ڪاميابين سبب ملڪ دشمن عنصر سازشن ۽ دهشتگردي ذريعي امن خراب ڪرڻ جون ڪوششون ڪري رهيا آهن، پر اهڙين ڪوششن سان قوم جا حوصلا هرگز پست نٿا ٿي سگهن.
ڪراچي ۾ رينجرز جي ڪيمپ تي ٿيل بزدلاڻي حملي جي سخت لفظن ۾ مذمت ڪندي بلاول ڀٽو زرداري چيو ته پاڪستان جون سيڪيورٽي فورسز هر قسم جي دهشتگردي کي منهن ڏيڻ جي مڪمل صلاحيت رکن ٿيون. هن حملي آور دهشتگردن کي بروقت ۽ مؤثر ڪارروائي ذريعي انجام تائين پهچائڻ تي سيڪيورٽي فورسز جي پيشاوراڻي مهارت، بهادري ۽ فرض شناسي کي ساراهيو.
چيئرمين پيپلز پارٽي چيو ته ملڪ جي حفاظت ڪندڙ سيڪيورٽي اهلڪار پنهنجي جانين جا نذرانا ڏئي پاڪستان جي امن، سلامتي ۽ استحڪام کي يقيني بڻائي رهيا آهن، جن جي قربانين کي قوم هميشه احترام ۽ فخر سان ياد رکندي. هن چيو ته دهشتگردي خلاف جنگ ۾ پاڪستان جي سيڪيورٽي فورسز جو ڪردار بي مثال آهي ۽ سندن قربانين سبب ئي ملڪ ۾ امن قائم رکڻ ممڪن ٿيو آهي.
بلاول ڀٽو زرداري فائرنگ جي ڏي وٺ دوران ٽن رينجرز اهلڪارن جي شهادت تي گهري ڏک ۽ افسوس جو اظهار ڪندي شهيدن کي زبردست خراج عقيدت پيش ڪيو. هن شهيد اهلڪارن جي وارثن سان دلي همدردي ۽ تعزيت جو اظهار ڪندي دعا ڪئي ته الله تعاليٰ شهيدن کي جنت الفردوس ۾ اعليٰ مقام عطا فرمائي ۽ سندن پونئيرن کي صبر جميل نصيب ڪري.
هن چيو ته دهشتگرد پاڪستان جي امن کي نقصان پهچائڻ ۽ قومي اتحاد کي ڪمزور ڪرڻ چاهين ٿا، پر سڄي قوم پنهنجي سيڪيورٽي ادارن سان گڏ بيٺل آهي. پاڪستان جا عوام، هٿياربند فوجون، رينجرز، پوليس ۽ ٻيا قانون لاڳو ڪندڙ ادارا گڏجي دهشتگردي جي خاتمي لاءِ پنهنجو ڪردار ادا ڪري رهيا آهن.
چيئرمين پيپلز پارٽي زور ڀريو ته دهشتگردي خلاف قومي اتحاد، سياسي هم آهنگي ۽ گڏيل حڪمت عملي وقت جي اهم ضرورت آهي. هن چيو ته دشمن جي هر سازش کي ناڪام بڻائڻ لاءِ قومي يڪجهتي ضروري آهي ۽ پاڪستان جي سلامتي تي ڪو به سمجهوتو نه ڪيو ويندو.
بلاول ڀٽو زرداري وڌيڪ چيو ته پاڪستان سفارتي، سياسي ۽ معاشي شعبن ۾ اڳتي وڌي رهيو آهي ۽ عالمي برادري سان لاڳاپا وڌيڪ مضبوط ٿي رهيا آهن. هن چيو ته پاڪستان جي سفارتي ڪاميابين ۽ عالمي سطح تي ملندڙ عزت سبب دشمن قوتون پريشان آهن، پر پاڪستان پنهنجي ترقي ۽ امن جي سفر کي هر حال ۾ جاري رکندو.
هن آخر ۾ شهيد رينجرز اهلڪارن جي قربانين کي سلام پيش ڪندي چيو ته قوم پنهنجي بهادر سپاهين تي فخر ڪري ٿي ۽ ملڪ جي دفاع، امن ۽ استحڪام لاءِ ڏنل انهن قربانين کي ڪڏهن به وساري نه سگهندي. پاڪستان جا سيڪيورٽي ادارا مستقبل ۾ به دهشتگردي جي هر خطري کي ناڪام بڻائڻ لاءِ مڪمل تياري سان پنهنجون ذميواريون نڀائيندا.
