ٽنڊوڄام : ٽنڊوڄام ويجهو ڪنر پلانٽ ڀرسان مري برادري جي ماڻهن مبينا ناانصافين خلاف احتجاجي مظاهرو ڪندي اعليٰ اختيارين کان انصاف فراهم ڪرڻ جو مطالبو ڪيو.
احتجاج ڪندڙن بينر ۽ پلي ڪارڊ کڻي نعريبازي ڪئي ۽ مطالبو ڪيو ته سندن شڪايتن جو شفاف نموني ازالو ڪيو وڃي.
ان موقعي تي احتجاج جي اڳواڻي ڪندڙ علي نواز مري ميڊيا سان ڳالهائيندي الزام هنيو ته بڪيرا پوليس مبينا طور هڪ بااثر ڌر جي ملي ڀڳت سان بلاول مري، عثمان مري ۽ مصطفيٰ مري جي چوڻ تي سندن خلاف ڪوڙو ايف آءِ آر داخل ڪيو آهي.
هن وڌيڪ چيو ته گذريل ڇهن مهينن کان کين مختلف طريقن سان هراسان ڪيو پيو وڃي. سندس چوڻ هو ته سندن واٽر ڪورس پڻ ڊاهي زرعي زمينن ڏانهن ايندڙ پاڻي بند ڪيو ويو آهي، جنهن سبب سندن فصلن ۽ زرعي زمينن کي سخت نقصان پهتو آهي ۽ زمينن جي بنجر ٿيڻ جو خطرو وڌي ويو آهي.
احتجاج ڪندڙن ايس ايس پي ٽنڊو الهيار ۽ ڊي آءِ جي حيدرآباد کان مطالبو ڪيو ته معاملي جي شفاف، غيرجانبدار ۽ منصفاڻي جاچ ڪرائي وڃي، ذميوارن خلاف قانون موجب ڪارروائي ڪئي وڃي، زرعي پاڻي جي فراهمي بحال ڪئي وڃي ۽ متاثر خاندانن کي تحفظ سان گڏ انصاف فراهم ڪيو وڃي.
