بہاول نگر: پنجاب کے ضلع بہاول نگر کے علاقے چشتیاں میں بکری کو بچانے کی کوشش کے دوران کنویں میں اترنے والے تین نوجوان دم گھٹنے سے جاں بحق ہوگئے۔
پولیس کے مطابق جاں بحق ہونے والوں میں دو سگے بھائی بھی شامل ہیں، جبکہ تینوں نوجوان ایک بکری کے کنویں میں گرنے کے بعد اسے نکالنے کی کوشش کر رہے تھے۔
پولیس کا کہنا ہے کہ پہلے ایک نوجوان کنویں میں اترا، تاہم واپس نہ آ سکا، جس کے بعد دیگر دو نوجوان بھی یکے بعد دیگرے اسے بچانے کے لیے کنویں میں اترے، لیکن وہ بھی دم گھٹنے کے باعث جان کی بازی ہار گئے۔
ریسکیو حکام کے مطابق جاں بحق افراد کی عمریں 19 سے 24 سال کے درمیان تھیں۔ اطلاع ملنے پر ریسکیو ٹیمیں موقع پر پہنچیں اور تینوں نوجوانوں کی لاشیں کنویں سے نکال کر متعلقہ حکام کے حوالے کر دیں۔
پولیس نے واقعے کی ابتدائی کارروائی مکمل کرنے کے بعد مزید تحقیقات شروع کر دی ہیں، جبکہ افسوسناک واقعے پر علاقے میں سوگ کی فضا چھا گئی ہے۔
