لاهور: پاڪستان ڪرڪيٽ بورڊ (پي سي بي) قومي ڪرڪيٽ ٽيم جي رانديگرن جي ميچ فيس ۾ واڌ جي منظوري ڏئي ڇڏي آهي، جڏهن ته پاڪستان سپر ليگ (پي ايس ايل) جي 12هين ايڊيشن جي بجيٽ ۽ ٻين اهم منصوبن جي به منظوري ڏني وئي آهي.
پي سي بي چيئرمين محسن نقوي جي صدارت هيٺ بورڊ آف گورنرز جو اجلاس ٿيو، جنهن دوران مالي سال 2026-27ع جي سرپلس بجيٽ متفقه طور منظور ڪئي وئي.
اجلاس ۾ فيصلو ڪيو ويو ته پي ايس ايل کي انتظامي ۽ مالي لحاظ کان وڌيڪ خودمختيار بڻايو ويندو، جڏهن ته پي ايس ايل 12 جي بجيٽ جي به منظوري ڏني وئي. ان کان علاوه ملڪ ۾ ڊوميسٽڪ ڪرڪيٽ جي واڌاري لاءِ بجيٽ 3 ارب رپين مان وڌائي 4 ارب رپيا ڪرڻ جو پڻ فيصلو ڪيو ويو.
چيئرمين پي سي بي محسن نقوي اجلاس دوران قومي ڪرڪيٽ ٽيم جي رانديگرن لاءِ نئين سينٽرل ڪنٽريڪٽ فارميٽ ۽ ادائيگين جي طريقيڪار جي منظوري ڏني، جڏهن ته مختلف فارميٽن ۾ ميچ فيس وڌائڻ جو به اعلان ڪيو ويو.
ميچ فيس ۾ واڌ
ذريعن موجب:
- ٽيسٽ ڪرڪيٽ کيڏندڙ رانديگرن جي ميچ فيس 15 لک رپيا هوندي.
- ون ڊي انٽرنيشنل رانديگرن کي 6 لک 50 هزار رپيا في ميچ ملندا.
- ٽي ٽوئنٽي انٽرنيشنل رانديگرن کي 4 لک 50 هزار رپيا في ميچ ادا ڪيا ويندا.
اي ڪيٽيگري
- ٽيسٽ رانديگر: 15 لک رپيا في ميچ
- ون ڊي رانديگر: 7 لک 50 هزار رپيا في ميچ
- ٽي ٽوئنٽي رانديگر: 6 لک 50 هزار رپيا في ميچ
بي ڪيٽيگري
- ون ڊي رانديگر: 7 لک 50 هزار رپيا في ميچ
- ٽي ٽوئنٽي رانديگر: 5 لک رپيا في ميچ
سي ڪيٽيگري
- ٽي ٽوئنٽي رانديگر: 5 لک رپيا في ميچ
- جيڪڏهن سي ڪيٽيگري جو رانديگر ون ڊي کيڏي ته کيس به 5 لک رپيا ميچ فيس ملندي.
قائداعظم ٽرافي ۽ ريزرو رانديگرن لاءِ وڏو اعلان
پي سي بي بورڊ آف گورنرز قائداعظم ٽرافي ۾ شرڪت ڪندڙ رانديگرن جي ميچ فيس 30 هزار رپين مان وڌائي هڪ لک رپيا ڪرڻ جي منظوري ڏني.
ساڳئي طرح ريزرو رانديگرن جي ميچ فيس 15 هزار رپين مان وڌائي 50 هزار رپيا ڪئي وئي.
عورتن جي ڪرڪيٽ ۽ گرائونڊ اسٽاف لاءِ قدم
بورڊ عورتن جي ون ڊي ۽ ٽي ٽوئنٽي ٽورنامينٽن جي انعقاد ۽ ان لاءِ فنڊز مختص ڪرڻ جي منظوري پڻ ڏني.
ان کان علاوه ريجنل گرائونڊ اسٽاف جي گهٽ ۾ گهٽ پگهار 42 هزار رپيا مقرر ڪرڻ جو فيصلو ڪيو ويو.
انفراسٽرڪچر لاءِ 6 ارب 70 ڪروڙ رپيا
اجلاس دوران 12 وڌيڪ گرائونڊز کي آپريشنل ڪرڻ، نيشنل اسٽيڊيم سميت ٻين ڪرڪيٽ سهولتن جي اپگريڊيشن لاءِ 6 ارب 70 ڪروڙ رپين جي منظوري ڏني وئي.
پي سي بي هاءِ پرفارمنس سينٽر لاهور ۾ جديد بائيو ميڪينڪس مشين لڳائڻ لاءِ به فنڊز مختص ڪرڻ جي منظوري ڏني، جنهن سان رانديگرن جي ڪارڪردگي ۽ فٽنيس جي سائنسي بنيادن تي وڌيڪ بهتر نگراني ممڪن بڻائي سگهبي.
پي سي بي جي انهن فيصلن کي پاڪستاني ڪرڪيٽ جي ترقي، رانديگرن جي حوصلا افزائي ۽ ڊوميسٽڪ ڪرڪيٽ جي معيار کي بهتر بڻائڻ لاءِ هڪ اهم قدم قرار ڏنو پيو وڃي.
