دادو دادو رابطا ڪاميٽي سول سوسائٽي جي اڳواڻن شهر کي درپيش بنيادي مسئلن جي حل لاءِ ڪچهري روڊ تي علامتي بک هڙتال ڪري احتجاجي مظاهرو ڪيو. ان موقعي تي مظاهرين هٿن ۾ پلي ڪارڊ ۽ بينر کڻي لاڳاپيل ادارن خلاف سخت نعريبازي ڪئي ۽ شهرين جا مسئلا فوري طور حل ڪرڻ جو مطالبو ڪيو.
احتجاج دوران سول سوسائٽي جي چيئرمين غلام مصطفى جانوري، جنرل سيڪريٽري عارف جمالي، فاروق جتوئي، ذوالفقار انڙ، افضل سيال، مراد علي جتوئي، عباس قريشي، سڄڻ منگسي ۽ ٻين ميڊيا سان ڳالهائيندي چيو ته مختلف سرڪاري ادارن جي نااهلي ۽ مبينا بدانتظامي سبب دادو جا شهري سخت تڪليفن کي منهن ڏئي رهيا آهن، پر لاڳاپيل اختيارين طرفان ڪو به سنجيده نوٽيس نه ورتو پيو وڃي.
هنن الزام هنيو ته واپڊا جي انجنيئر عزيز پنهور، ٺيڪيداري نظام ۽ عملي جي مبينا نااهلي سبب شهر ۾ بنا اطلاع جي اڻ اعلانيل لوڊشيڊنگ معمول بڻجي وئي آهي، جڏهن ته بجلي جي بلن ۾ مبينا ناجائز ڪٽوتيون ۽ اضافي چارجز شامل ڪري شهرين تي مالي بار وڌو پيو وڃي.
احتجاج ڪندڙن وڌيڪ چيو ته ميونسپل ڪاميٽي دادو جي چيئرمين پير دانش، سي ايم او مختيار راھپوٽو ۽ اڪائونٽنٽ جاويد راھپوٽو جي مبينا ناقص ڪارڪردگي سبب شهر ۾ صفائي سٿرائي جو نظام سخت متاثر ٿيو آهي. گهٽين ۽ روڊن تي گندگي جا ڍير لڳل آهن، جڏهن ته نيڪال جو پاڻي رستن تي بيهڻ سبب ماحولياتي آلودگي وڌي رهي آهي ۽ مختلف بيمارين پکڙجڻ جو خطرو پيدا ٿي ويو آهي.
سول سوسائٽي جي اڳواڻن روينيو کاتي جي آفيسرن، اسسٽنٽ ڪمشنر سميع الله وڳڻ ۽ مختيارڪار عبدالحميد کوکر تي پڻ مبينا ڪرپشن جا الزام هڻندي سندن ڪارڪردگي تي سخت تنقيد ڪئي.
هنن چيو ته ڊپٽي ڪمشنر دادو سيد مرتضى شاهه جي آفيس آڏو به گذريل هڪ مهيني کان پاڻي بيٺل آهي، جنهن سبب شهرين کي اچ وڃ ۾ سخت ڏکيائين کي منهن ڏيڻو پوي ٿو، پر ان باوجود مسئلي جي حل لاءِ ڪو به قدم نه کنيو ويو آهي.
احتجاج ڪندڙن سنڌ حڪومت ۽ لاڳاپيل ادارن کان مطالبو ڪيو ته شهرين کي بنيادي سهولتون فراهم ڪيون وڃن، اڻ اعلانيل لوڊشيڊنگ جو خاتمو ڪيو وڃي، بجلي جي بلن ۾ مبينا ناجائز ڪٽوتيون بند ڪيون وڃن، شهر ۾ صفائي سٿرائي جو مؤثر نظام بحال ڪيو وڃي، روڊن تي بيٺل پاڻي جي نيڪال کي يقيني بڻايو وڃي ۽ عوام سان ٿيندڙ مبينا زيادتين جو نوٽيس وٺي ذميوارن خلاف قانون موجب ڪارروائي ڪئي وڃي، ٻي صورت ۾ احتجاج جو دائرو وڌيڪ وسيع ڪيو ويندو.
