بنو: خيبرپختونخوا جي شهر بنو ۾ پاڪستان اليڪٽرڪ سپلاءِ ڪمپني (پيسڪو) دعويٰ ڪئي آهي ته صوبائي اسيمبلي جي ميمبر ملڪ راحت 132 ڪي وي گرڊ اسٽيشن ۾ داخل ٿي عملي کي زبردستي سڀئي فيڊر هلائڻ تي مجبور ڪيو، جنهن سبب بجلي جو نظام اوور لوڊ ٿي ويو ۽ شهر جي ڪيترن ئي علائقن ۾ بجلي جي فراهمي معطل ٿي وئي.
پيسڪو جي ترجمان موجب واقعي دوران سڀئي فيڊر هڪ ئي وقت هلائڻ سبب گرڊ اسٽيشن جو نظام دٻاءُ برداشت نه ڪري سگهيو، جنهن جي نتيجي ۾ سسٽم اوور لوڊ ٿي ويو ۽ بنو گرڊ اسٽيشن مان بجلي جي فراهمي بند ٿي وئي.
ترجمان جو چوڻ آهي ته بجلي جي فراهمي معطل ٿيڻ کان پوءِ بنو جي اڪثر علائقن ۾ اوندهه ڇانئجي وئي، جنهن سبب رهواسين کي سخت تڪليفن کي منهن ڏيڻو پيو. بجلي بند ٿيڻ سان گهريلو صارفين سان گڏ واپاري سرگرميون ۽ روزمره جا معمول پڻ متاثر ٿيا.
پيسڪو موجب واقعي کان پوءِ فوري طور تي ٽيڪنيڪل عملي کي گرڊ اسٽيشن تي طلب ڪيو ويو، جنهن مرمتي ۽ بحالي جا ڪم شروع ڪري ڇڏيا. اداري جو چوڻ آهي ته پيسڪو جي چيف جي هدايتن تي انجنيئرن ۽ فني ماهرن کي مقرر ڪيو ويو آهي ته جيئن جلد کان جلد بجلي جو نظام بحال ڪري صارفين کي رليف فراهم ڪيو وڃي.
ترجمان وڌيڪ ٻڌايو ته اداري واقعي کي انتهائي سنجيدگي سان ورتو آهي ۽ صوبائي اسيمبلي جي ميمبر ملڪ راحت خلاف قانون موجب ڪارروائي ڪئي ويندي. سندس چوڻ هو ته گرڊ اسٽيشن جهڙن حساس تنصيبات ۾ غير مجاز مداخلت نه رڳو قانون جي ڀڃڪڙي آهي، پر ان سان قومي بجلي نظام کي به نقصان پهچي سگهي ٿو.
پيسڪو جو چوڻ آهي ته بجلي جي ورڇ جو نظام فني اصولن ۽ لوڊ مينيجمينٽ جي ضابطن تحت هلندو آهي، تنهن ڪري ڪنهن به شخص طرفان زبردستي فيڊر هلائڻ يا بند ڪرائڻ سان سڄي نظام جي ڪارڪردگي متاثر ٿي سگهي ٿي.
واقعي کان پوءِ لاڳاپيل اختيارين جاچ شروع ڪري ڇڏي آهي، جڏهن ته گرڊ اسٽيشن تي موجود عملي کان به بيان ورتا پيا وڃن. جاچ دوران سي سي ٽي وي فوٽيج ۽ ٻين ثبوتن جو به جائزو ورتو ويندو ته جيئن واقعي جي سمورن پهلوئن کي واضح ڪري سگهجي.
هوڏانهن پيسڪو صارفين کي يقين ڏياريو آهي ته بجلي جي فراهمي جلد بحال ڪرڻ لاءِ تيزي سان ڪم جاري آهي ۽ نظام مڪمل طور بحال ٿيڻ تائين فني ٽيمون موقعي تي موجود رهنديون. اداري شهرين کان صبر ۽ سهڪار جي اپيل ڪندي چيو آهي ته ڪنهن به نئين صورتحال بابت کين بروقت آگاهه ڪيو ويندو.
