اسلام آباد: اسٽيٽ بئنڪ آف پاڪستان ملڪ جي سمورن بئنڪن کي هدايت جاري ڪئي آهي ته ڪنهن به قانوني سبب، مجاز اٿارٽي جي منظوري ۽ ضروري تصديق کان سواءِ ڪنهن به صارف جو بئنڪ اڪائونٽ بلاڪ نه ڪيو وڃي.
اسٽيٽ بئنڪ اها هدايت اسلام آباد هاءِ ڪورٽ جي حڪم تي تيار ڪيل عملدرآمد رپورٽ ۾ جاري ڪئي، جيڪا عدالت ۾ جمع ڪرائي وئي آهي.
رپورٽن موجب، اسلام آباد هاءِ ڪورٽ جي جسٽس ارباب محمد طاهر اسٽيٽ بئنڪ کي هدايت ڪئي هئي ته بئنڪن لاءِ واضح اندروني طريقه ڪار (ميڪينزم) تيار ڪري مناسب هدايتون جاري ڪيون وڃن، جيئن بئنڪ اڪائونٽن جي بندش بابت قانوني ۽ انتظامي ضابطا واضح ٿي سگهن.
عدالت ۾ جمع ڪرايل رپورٽ موجب، اسٽيٽ بئنڪ بئنڪن کي اهو به هدايت ڪئي آهي ته غير ارادي يا احتياطي بنيادن تي لاڳو ڪيل پابندين سبب اڪائونٽ هولڊرن کي غير ضروري نقصان نه پهچڻ گهرجي.
مرڪزي بئنڪ موجب، ڪنهن به اڪائونٽ کي بلاڪ ڪرڻ کان اڳ لاڳو قانونن، مجاز اٿارٽي جي منظوري ۽ لاڳاپيل تصديق واري عمل کي مڪمل ڪرڻ لازمي هوندو، جيئن صارفين جي مالي حقن جو تحفظ يقيني بڻائي سگهجي.
اسٽيٽ بئنڪ عدالتي حڪم جي روشني ۾ ملڪ جي سمورن بئنڪن کي نئون هدايت نامو جاري ڪري ڇڏيو آهي، جنهن ۾ واضح ڪيو ويو آهي ته بئنڪون انهن هدايتن تي مڪمل عملدرآمد لاءِ پنهنجي ضرورت موجب مناسب اندروني ميڪينزم پڻ تيار ڪري سگهن ٿيون.
مرڪزي بئنڪ جو چوڻ آهي ته نئين هدايتن جو مقصد بئنڪنگ نظام ۾ شفافيت، قانوني تقاضائن تي عمل ۽ صارفين جي حقن جو تحفظ يقيني بڻائڻ آهي، ته جيئن ڪنهن به شهري کي غيرضروري طور مالي تڪليف يا اڪائونٽ تائين رسائي کان محرومي کي منهن نه ڏيڻو پوي.
